uMthunywa
Nkosilathi Sibanda
OWATHI emini akugidwa ngubani?
Inkampani yokujabulisa abantu iFife Street Events isizimisele ukuthi ihambe phambili ngokuqhuba imicimbi yezomculo emini.
IFife Street Events ibika ukuba abathandi bezomculo lobunandi koBulawayo bakhangelelwe ukuzwa umculo we-deep house osezingeni eliphezulu, mhla kuqhunsa u-Sun El Musician ngoMgqibelo emini.
Usaziwayo we-South Africa lo uzakholisisa abantu enkundleni yeBusters Sports Field.
Imicimbi eqhutshwa emini iyivelakanci kulelidolobho ngakho lo kubikwa uzabe unxuse bonke abantu njalo ulungele yonke imuli, ngokutsho kwabaqoqi bomcimbi.
Umfanekiso lo uthethwe kuShutterstock
Abaculi bakuleli labo-DJ abakhangelelwe ukuthi bangene esitikini babalisa uRebellious Suhnz, Reno Life loRyan Synth.
Ekhuluma lentatheli kaMthunywa uJunior Mbanje oweFife Street Events, uthe umcimbi wabo uqhutshwa ngendikimba ethi Fun In The Sun njalo unikeza abathandi bobunandi isikhathi sokuzijabulisa endaweni enxusa amalunga omdeni wonke.
“Sekulesikhathi siqoqe uhlelo lomculo olusezingeni eliphezulu emini. Sifuna ukuphakamisa lokukhankasela lokhu ngokuqoqa umcimbi lo wangoMgqibelo,” kutsho uMbanje.
“Kubalulekile ukwazi ukuthi abantu abanengi balemuli ngakho abenelisi ukuphuma ebusuku bezobona imbukiso ephela phakathi kwamabili.
“Banengi abalesifiso esivuthayo sokubukela umculi abamthandayo emini. Ngakho-ke imicimbi yemini iyindlela yethu yokwamukela abalaleli bomculo abehluleka ukuzijabulisa ebusuku edolobheni lethu.”
