uMthunywa
BakaMalandela kuhle ukujabuliswa ngendlela ezehlukeneyo, kule iviki iphephandaba likazulu lithe like lijabulise uzulu ngezenkonzo. Yikho nje lize letshatshazi lentombi elingena kuwe amadimoni wonke awele phansi.
Ingilosi yentombi le nguNombeko Khahlela ingqavithi edabuka eMzola. Kaliculi nje lelitshatshazi lithela amanzi.
Lingakhutheki bakwethu nansi ingxoxo emnandi phakathi kwentatheli yephephandaba likazulu uCornelius Luphahla (CL) lale ingilosi yodumo uNombeko Khahlela (NK).
CL: Akuthi fahlafahla ngamafitshane ntombenhle mayelana lembali yakho kanye leyomculo wakho?
NK: Mina ngazalwa mhlaka 4 Ncwabakazi ngo1985 esibhedlela seSt Lukes. Ngakhulela eMzola kwathi ngo1991 ngayangena uGiredi 1 eMzola 52 Primary School ngaqeda khona uGiredi 7 ngo1997. Ngo1998 ngayangena uFomu 1 eZenzele Secondary School kodwa ngama ngo2000 senginguFomu 2 ngemva kokuba abazali bami bethe abaselamali yokungifundisa.
Ngasuka-ke ngayahlala koBulawayo, ngo2001 ngaya kweleSouth Africa ukuyadinga umsebenzi. Ukucula ngaqala ngo2014 lapho engangiculela iqembu elithiwa yiFollowers of Life. Ngabuya njalo ngacula lomnawami uThakazela Khahlela loMkhosi Magubane kuqembu elithiwa Maqhawe eVangeli.
Ngaqhubeka njalo ngezomculo ngo2015 ngasungula iqembu lami ngedwa elibizwa ngokuthi nguNombeko Khahlela.
CL: Njengomculi akutsho ukuthi sowakhipha amadlalade amangaki lokhe waqala ukucula?
NK: Mina njengomculi we-gospel sengakhipha amadlalade amabili lokhe ngaqala ukucula. Elakuqala ngelithi Ingonyama kaJuda engalikhipha ngo2014 ngemva kokusungula iqembu elithi Amaqhawe eVangeli ngiloThakazela Khahlela loMkhosi Magubane. Elesibili lithi Ukulalela njalo ngilikhiphe ngo2015, lapho-ke ngasengisungule elami iqembu elithi uNombeko Khahlela.
Noma nje ngihlabela kuqembu laMaqhawe eVangeli kodwa ngiyahlabela njalo ngingedwa nginguNombeko Khahlela.
CL: Uzulu uthanda ukwazi ukuthi ujayele ukutshayela ngaphi ingoma zakho njalo zitholakala ngaphi?
NK: Ingoma zami ngandise ukuzitshayela emikhosini etshiyeneyo egoqela ama-conferences ezinkonzo ezitshiyeneyo lapho engibizwa khona, kuma-shows, emitshadweni kanye lakweminye imikhosi etshiyeneyo. Ngakho-ke ingoma zami zitholakala kimi ngoba ngiyazithengisela mina noma nje sokulabanye abazitshontshayo besebezithengisa ngendlela engekho emthethweni.
CL: Akutsho ntombenhle ukuthi abantu bathini ngomculo wakho njalo ukhangelele ukwenzelani uzulu lonyaka?
NK: Abantu bayawujabulela kakhulu umculo wami njalo bangikhuthaza ukuthi ngiqhubekele phambili ngicula ngingadeli ngoba ngibaculela kamnandi. Ngalokhu lonyaka ngikhangelele ukubaphekela idlalade elitsha ngibuye ngivakatshele indawo ezehlukeneyo ngihamba ngisenza ama-shows ami ukuze ngizwise abantu umculo wami.
Okunye njalo ngikhangelele ukuvakatshela kithi koMthwakazi ngoNcwabakazi ngiyetshayela khona ingoma zami ukuze labo bawuthole umculo wami.
CL: Kungani wakhetha ukuculela kweleSouth Africa njalo ngaphandle kokucula msebenzi bani owenzayo tshatshazi?
NK: Okwenza ngiculele kweleSouth Africa yikuthi yiyo indawo okulula ukuthi uthole imitshina yokuculisa njalo yikuthi kweleSouth Africa zinengi indawo zokuthengisela umculo. Okunye njalo kulula ukuba uphile ngokuzisebenza lapha eSouth Africa ngoba kulabantu abanengi. Ngakho-ke ngaphandle kokucula mina ngiyazisebenza.
CL: Bunzima bani oyake uhlangane labo njengomculi we-gospel ntombenhle njalo nkuthazo bani oyipha abaculi abasacathula?
NK: Ubunzima engiyake ngihlangane labo yikuswela imali yokuzithuthukisa kanye leyokuthenga eminye imitshina edingeka ekuculeni engangingelayo. Okunye njalo bengihlutshwa yikuswela indlela zokwenza umculo wami waziwe ngabantu abanengi.
Kubaculi abasasungula ngithi noma abanye abantu bengabachothoza kodwa bengadeli kabaqhubekele phambili becula. Ngibakhuthaza njalo ukuthi kabahloniphe uzulu ukuze bathole ukuhlonitshwa njalo bathole abalandeli emculweni wabo.
