uMthunywa
ABADALA bathi umthwentwe uhlaba usamila, baphinde njalo bathi ikhula lamanono ayo. Abanye bethiwa amagama kuthiwe ngomakhula belibele, abanye behleli phezulu kwamaphupho lezifiso zabo abanye bayakuhlakulela banethezeke.
Kule iviki iphephandaba likazulu lidibane lomunye umhleli lomqoqi womculo uTrust Kajera owaba lephupho lokuloba umculo engumfanyana omncane. Lamhlanje waziwa ngokuthi nguT Fresh (TF) njalo usephendule indlu yakhe yaba yistudiyo ePlumtree.
Qhubeka uzwe ngoT Fresh kungxoxo abe layo loSamkelo Tshuma (ST).
ST: Sitshele ngembali yakho yokuthanda ezokucula
TF: Ngaqala ukuthanda lumsebenzi ngiseseleminyaka eyisificaminwe mibili njalo ngaleso sikhathi ngasengisenelisa lokutshaya i-piano enkozweni kanye lesikolo. Ngo 2009 ngaguqula indlu yami yokulala yaba yistudiyo lapho engangisenza khona ingoma labangane bami. Ngo-2011 ngaya eSouth Africa ukuyafundela iMusic Production & Sound engineering.
ST: Lezinsuku usebenzela ngaphi?
TF: Ngisebenzela ePlumtree lapho ekulesinye istudiyo sami, esinye sisePretoria.
ST: Suleminyaka emingaki usenza ezomculo?
TF: Ngileminyaka emine ngisenza ezomculo ebangeni eliphezulu.
ST: Suke wadlala emicimbini emikhulu kumbe wathola isicoco?
TF: Ngo 2013 ngathola isicoco eSouth Africa sokuba yi-Best Music Producer, mina angiculi kodwa abantu engibasizayo sebeke bacula emicimbini emikhulu.
ST: Nhlupho bani osuke wahlangana lazo kule indlela njalo zifundo bani owazithola kulokho?
TF: Uhlupho olukhulu engahlangana lalo yikuthi kwakunzima ukuthi abantu banginanzelele ngilesiphiwo esinje, kodwa angizange ngikhalale ngaqhubeka ngizama. Engakufundayo kukho konke lokhu yikubekezela. Sengike ngathola ithuba lokusebenza labaculi abalodumo
ST: Yibaphi abaculi osuke wasebenza labo?
TF: Ngisebenze lo Davido, Wizkid, St Seaba kunye lo Diva Mfunga.
ST: Kuvamile ukuthi abantu abaqalayo kwezomculo baye babhuluke ngenxa yokuswela imali yokuqhuba ibhizimusi, ngubani owakuxhasayo ngemali ukuthi uze ube lapho okhona lamuhla?
TF: Mina ngaxhaswa ngabazali bami, ngoba bebona ngilesipho esikhulu.
ST: Yiwuphi omunye umsebenzi owenzayo ngaphandle kokuba yi-music producer & sound engineer?
TF: Ngenza i-marketing and promotion yabaculi engisebenza labo, ngilenkampani ebizwa ngokuthi yiTrogp Records.
ST: Ubanika mlayezo bani labo abafuna ukwenza umsebenzi ofana lowakho?
TF: Bangajahi izinto, ukugijima ayisikho kufika, ukubekezela kuyabhadala.
