uMthunywa
MTHWAKAZI omuhle kule iviki ziza zibelethene indaba ezimnandi ngoba iphephandaba likazulu lize lejaha elimajaha mabili nanku phela lingumculi libuye njalo libe ngumpheki wezingoma. Kayitshayi nje iyabulala lindoda kuHouse Music, ingena kuncibilike inhlaka ezihlahleni.
Ungakhutheki muntu wabantu nansi ingxoxo emnandi okwamagama phakathi kwalelijaha elidume ngokuthi ngu-Cooperman kwezomculo noma nje igama layo kunguMncedisi Mawonondo (MM). UMawonondo uxoxe lentatheli yephephandaba likazulu uCornelius Luphahla (CL).
CL: Akuchazele umphakathi jahelibanzi mayelana lembali yakho kanye leyomculo wakho?
MM: Mina ngazalwa mhlaka 7 Mpandula ngomnyaka ka1981 esibhedlela seMpilo koBulawayo. Izifundo zami ngaziqala esikolo seMazwi Primary lapho engaqala khona uGiredi 1. Ngasuka lapho ngayafunda uGiredi 2 eNsukamini Primary School ngasuka njalo ngayafunda uGiredi 3 kusiya kuGiredi 5 eRobert Tredgold. Ngemva kwalokho ngabuyela eNsukamini Primary okuyikho engaqedisela khona uGiredi 7.
Ngaqhubeka njalo ngezifundo zami ngaya kuFomu 1 eMilton High School khonapha koBulawayo ngaze ngayaqeda khona uFomu 4. Ngemva kwalokho ngaqhubeka ngayafunda iNational Certificate in Fitter and Turner ePolytechnic khonapha koBulawayo. Ngafunda umnyaka owodwa ngasengilahlekelwa ngabazali okwadala ukuthi ngiyekele ukufunda ngenxa yokuswela imali, kwathi ngo-2002 ngaqala ezokucula lokuba nguDJ ngisungula kanye lama-ringing tones. Ngo-2006 ngaqala ukusungula ingoma zami kwathi ngo-2010 ngayakuba nguDJ kwele-South Africa ngapho ngisebenza eStar FM kwaze kwayafika u2013.
CL: Lokhe waqala ukucula sowakhipha amadlalade amangaki njalo abantu bathini ngomculo wakho mfoka Mawonondo?
MM: Njengomculi ongu-producer njalo sengakhipha amadlalade amane, elakuqala ngalikhipha ngo-2008 elithi Dip Cut, ngakhipha njalo elithi The Reloaded ngo2010, lelithi In the game engalikhipha ngo-2010 ngilo DJ Clock ngaphetha ngelithi Spirit of Africa ngo-2013. Noma kunjalo sengakhipha ingoma ezinengi kuma-single atshiyeneyo engilokhu ngiwakhipha lakhathesi.
Ekukhipheni kwami ama-singles la ngiyake ngikhiphe ngilo DJ Clock, Rock Boys, Groover Lounch, Bekzin Terrance kanye loBob Skinner abe South Africa. KweleZimbabwe ngiyake ngicule loQeqetshiwe, Mfundisi Masotsha, kanye labanye abaculi abatshiyeneyo.
Ngalokhu-ke abantu bayawujabulela kakhulu umculo wami njalo bangikhuthaza ukuthi ngiqhubekele phambili ngibajabulisa ngengoma zami.
CL: Tshela abantu jahelihle ukuthi ingoma zakho ujwayele ukuzitshayela ngaphi njalo ukhangelele ukwenzelani uzulu lonyaka?
MM: Ingoma zami ngivame ukuzitshayela emidlalweni etshiyeneyo efana lamadili okuzalwa, emitshadweni kanye lakuma-shows atshiyeneyo. Lonyaka ngikhangelele ukukhiphela uzulu ezinye ingoma ezimnandi njalo ngifuna ukufafaza umculo wami endaweni ezitshiyeneyo ngoba abantu bayawudinga kakhulu.
CL: Uzulu uthanda ukwazi ukuthi ngaphandle kokucula msebenzi bani owenzayo?
MM: Mina ngaphandle kokucula ngingumphathi weBulawayo Knits eyifekithali yezomculo eseMorning Side koBulawayo. Yikho lapho engingu-producer khona njalo. Okunye njalo nginguDokotela wezothando emsakazweni weNational FM ngoLwesine maviki wonke ngo 11 ebusuku okuyikho engisebenza ukuhlanganisa abadinga omthobanhliziyo kanye lokuvuthisa uthando kwabathetheneyo asebehlangana lenhlupho ekuthandaneni kwabo.
Lapha yikho-ke engifundisa khona ngendlela zokuphathana kwabathetheneyo labasakhula kwezothando. Zonke inhlupho ezikhathaza kwezothando ngiyenelisa ukuzilungisisa njengodokotela wothando.
CL: Tshela uzulu Dokotela ukuthi bunzima bani oyake uhlangane labo njengomculi njalo nkuthazo bani oyipha abaculi abasacathula?
MM: Njengomculi ubunzima engihlangana labo yikuswela indawo engingathengisela khona ingoma zami njengoba kuleli akulamankampani okuthengisela umculo. Okunye njalo ngikhathazwa yikuthi abantu bayatshontsha umculo wami bawuthengise ngentengo ephansi okudala ukuthi nxa sengiwuthengisa abantu bengawuthengi ngoba sebejwayele otshiphileyo.
Kubaculi abasasungula ngithi kababambelele njalo bengaculeli ukuthi bathole udumo kodwa kabaculele ukuthi baleziphiwo zokucula. Okunye njalo kabahloniphe uzulu ukuze bathole abalandeli.
