uMthunywa
Iphephandaba likazulu njengoba lisaziwa vele ukuthi livame ukujabulisa uzulu ngendaba ezimnandi njalo ezehlukeneyo, lamhlanje lize lomunye njalo umculi odumileyo koMthwakazi ngokucula i-hip-hop ongena kunyakaze.
Kambe bakwethu kungaba ngubani ongena kuvume umphakathi kubaculi be hip-hop lapha koMthwakazi ngaphandle kuka Calvin Nhliziyo oyaziwa ngokuthi nguCal_Vin. Othanda ukuzijabulisa ngezomculo, nansi ingxoxo egijimisa igazi phakathi kwentatheli yephephandaba likaZulu uCornelius Luphahla (CL) lomculi wodumo uCalvin (CN).
CL: Akuthi fahlafahla ngamafitshane kumphakathi mayelana lembali yakho kanye leyomculo wakho jahelibanzi.
CN: Mina ngazalwa mhlaka 15 Mpalakazi ngomnyaka ka-1985 esibhedlela seMpilo koBulawayo. Kwathi ngomnyaka ka-1992 ngayangena uGiredi 1 eMtshingwe Primary School kwathi ngo-1994 ngasuka njalo ngayafunda eSikhulile Primary ngaze ngayaqeda uGiredi 7 ngo-1998. Ngemva kwalokho ngayangena uFomu 1 ngo 1999 esikolo seDavid Livingstone ngaze ngayaqeda ngo-2002.
Noma nje ngangivele ngiqale ukuhlabela ngo-1996 ngingakakhuphi idlalade ngaqhubeka-ke ngasengiqala uku-recorder ngo-2003. Ngaqhubeka-ke ngomculo wami ngaze ngazofika kulelizinga engikulo.
CL: Tshela abantu mfokaNhliziyo ukuthi lokhe waqala ukucula sowakhipha amadlalade amangaki njengomculi wodumo.
CN: Ukukhipha amadlalade ngaqala ngo-2014 ngakho sengakhipha amadlalade amahlanu athi Perfect balance, Dat Luveve Boy, Askies, Year of the Vin lethi Santa Vin. Amabili ngawakhipha ngo-2014 kwathi amathathu ngawakhipha ngo-2015. Ngakho njengomculi okwakhathesi ngikhangelele ukukhipha amavidiyo amadlalade la ngibuye njalo ngivakatshele indawo ezehlukeneyo ngitshaya ingoma zami ngijabulisa abantu.
CL: Uzulu uthanda ukwazi ukuthi njengomculi abantu bathini ngomculo wakho lo njalo kungani wakhetha ukucula i-hip-hop kulemiculo yesintu.
CN: Ngendlela engicula ngayo abantu bayawuthakazelela umculo wami kakhulukazi ngoba ngikhuluma nje ngiyake ngiwuzwe utshaywa emisakazweni emazweni aphetsheya agoqela i-Canada, United Kingdom, Australia, Botswana, South Africa kanye lakwamanye amazwe aphetsheya.
Okwenza ngacula i-hip-hop yikuthi ngakhula labanewethu ababevele bethanda umculo we hip-hop njalo babevame ukuwucula umculo lo. Lami-ke ngahle ngakhula ngiwuthanda umculo lo ngasengiqala lami ukuwucula.
CL: Njengomculi akutsho ukuthi bunzima bani oyake uhlangane labo ekuculeni njalo ingoma zakho wandise ukuzitshayela ngaphi?
CN: Mina ekuculeni lapha sengihlangane lobunzima obukhulu kakhulu noma nje ngenelisi ukuqinisela. Uhlupho olukhulu engiyake ngihlangane lalo yikuswelakala kwemali yokukhipha amadlalade kanye lokuthenga imitshina edingeka ekuculeni.Okunye njalo yikuthi angikaze ngithole uncedo kunhlanganiso ezitshiyeneyo ukuze ngizithuthukise.
Ngokunjalo-ke ingoma zami bengizitshaya nxa ngithe ngamenywa ngilabanye abahlabeleli abathile emikhosini etshiyeneyo. Noma nje ngangandise ukuhlabela emikhosini enjalo kodwa khathesi ngikhangelele ukuba lama-shows amanengi ukuze ngisakaze umculo wami ebantwini.
CL: Nkuthazo bani oyipha abaculi abasacathulayo jahelidala?
CN: Kubaculi abasacathulayo ngithi kabasebenze gadalala njalo baqinisele bengadeli noma kunzima ngoba ukucula kudinga umuntu oqiniselayo njalo obekezelayo. Okunye njalo ngithi kabaziphathe kuhle bahlabelele ukujabulisa umphakathi njalo bahloniphe ukuze labo bahlonitshwe nguzulu.
