uMthunywa
KULE iviki bakaMalandela iphephandaba likazulu liphethe ezihlabusayo zodwa njengoba lidume ngazo. Angithi nje liye layavumbulula ingadlangadla yeqembu lomculo wetshibilika elingena kuvungame umphakathi.
Leliqembu liholwa ngu-Ignatius, indoda edabuka eTsholotsho. Kayitshayi nje lindoda isiginci iyaphoxa. Othanda ukuzizwela mayelana laleliqembu kahlangane lengxoxo enambithekayo phakathi kwentatheli yephephandaba likazulu uCornelius Luphahla (CL) lengadlangadla yaleliqembu uIgnatius Mlalazi (IM).
CL: Akutsho ngamafitshane mayelana lembali yakho kanye leyomculo wakho jahelibanzi?
IM: Mina ngazalelwa esigabeni sakoMathe eTsholotsho okuyikho engakhulela khona ngabuya ngafunda khona ngaze ngayaqeda izifundo zami zikaFomu 4 ngo2004. Ngemva kwalokho ngasuka ngaya kweleSouth Africa ukuyadinga umsebenzi okuyikho engikhona lamanje.
Ezomculo ngaziqala ngomnyaka ka2014 lapho engangiculela iqembu leSisonke Connection. Kwathi ngo2016 ngasungula elami iqembu okuyilo engilikhokhelayo manje.
CL: Lokhe wasungula leliqembu selakhipha amadlalade amangaki njengeqembu?
IM: Njengeqembu elitsha sesikhuphe idlalade elilodwa elilesihloko esithi uSomandla 2. Lelidlalade ngalipha lesisihloko ngoba lilengoma ethi uSomandla njalo ngesikhathi ngisaculela iSisonke Connection ngasungula ingoma ethi uSomandla okuyiyo eyathandwa ngabantu kakhulu. Ingoma le ngibone kungcono ukuthi ngiqhubekele phambili ngayo.
CL: Akutsho jahalakithi ukuthi abantu bathini ngomculo wakho njalo ukhangele ukwenzelani uzulu lonyaka?
IM: Abantu bayawuthakazelela kakhulu umculo wami njalo bangikhuthaza ukuthi ngikhiphe iDVD ukuze bangibone ngamehlo. Ngalokhu lonyaka ngikhangelele ukuphekela uzulu ividiyo yengoma eyodwa kunyanga ezizayo ngibuye njalo ngibakhiphele idlalade elitshisa bhe ekupheleni komnyaka. Okunye njalo ngisazobavakatshela endaweni ezehlukeneyo ngibayenzela ama-shows.
CL: Kungani uculela kweleSouth Africa ungaculeli kwelakini mfokaMathe?
IM: Okwenza ngiculele phetsheya yikuthi leliqembu salisungula siphetsheya sisebenzela phetsheya ngakho kunzima ukuthi siculele kwelakithi ngoba amanye amalunga asuka abesemsebenzini ngesikhathi thina sikwelakithi. Lokhu kudala ukuthi kubenzima ukuba sicule njengoba siyabe singenelanga.
CL: Bunzima bani eliyake lihlangane labo njengeqembu njalo nkuthazo bani oyipha abaculi abasasungula?
IM: Ubunzima engiyake ngihlangane labo kwezomculo yikuswela imali yokuthenga impahla zokucula ngakho kusuka kube nzima ukuthi siphakame masinya kwezomculo. Okunye njalo yikuthi kulabantu abathatha umculo wethu bawuthengise ngentengo ephansi okuyikho okwenza umculo wethu ungaphakami.
Kubaculi abasasungula ngithi kabaqhubekele phambili ngomsebenzi wabo bengadeli noma behlangana lobunzima obunjani. Okunye njalo ngithi kabasebenzise iziphiwo zabo bengaculeli ukuthola idumo babuye bahloniphe uzulu ukuze bathole usekelo bathuthuke.
