uMthunywa
MTHWAKAZI omuhle ondlela zimhlophe njengensukwini iphephandaba likazulu lize lazo njalo ezivusa usinga ezikhumbuza izalukazi lamaxhegu asemxhiliba ngesikhathi besakhula. Nanku phela njengoba lidume ngezimnandi kule iviki liphethe ingadlangadla kwezomculo kamaskandi ijaha elimajaha mabili eliculela Amachwanamahle.
Angithi nje Amachwanamahle la aholwa nguThobani Masiya Mkhize indoda mdabuko engena kuthule umoya.
Kayitshayi nje isiginci lindoda ilomuntu phansi. Othanda ukuzithokozisa nansi ingxoxo ehlabusayo phakathi kwentatheli yephephandaba likazulu uCornelius Luphahla (CL) loThobani Masiye Mkhize (TM).
CL: Akuthi fahlafahla mayelana lembali yakho kanye lomculo wakho?
TM: Mina ngazalwa mhlaka 11 Lwezi ngomnyaka ka1990 esibhedlela seMpilo edolobheni lakoBulalwayo ngasengisiyakhulela esigabeni seBhalagwe eMatobo. Ngo 1997 ngayafunda uGiredi 1 eSewodo Primary School ngaze ngayaqeda uGiredi 7 ngo2003. Ngaqhubeka ngezifundo zami ngayafunda uFomu 1 eSewondo Secondary School ngasengiyekela ngikuFomu 3 ngo2005 ngenxa yokuthi abazali bami babengaselamali yokungifundisa. Kwathi ngo2006 ngasuka ngayasebenzela kweleSouth Africa.
Ukucula ngaqala ngo2012 lapho engangisacula lamanye amaqembu agoqela Indaba Zimnandi, Amafika Litshone kanye laBafana bakaMzilikazi. Kwathi ngo2014 ngaqala-ke ukusungula elami iqembu laMachwanamahle.
CL: Tshela uzulu mfokaMasiya ukuthi njengomculi kamaskandi sowakhipha amadlalade amangaki njalo abantu bathini ngomculo wakho?
TM: Lokhe ngaqala ukucula sengakhipha amadlalade amabili. Idlalade lakuqala ngalikhipha ngo2014 lithi, “EMaphisa Big Show”, lilengoma ezingu 12. Elinye njalo ngilikhiphe ngoMpalakazi kumnyaka ophelileyo lithi “Amazamazama” elilengoma ezingu 14.
Ngenxa yomculo wami lo abantu bayajabula kakhulu njalo bayawuthakazelela umculo wami, bangikhuthaza ukuthi ngiqhubekele phambili ngicula. Abanye njalo bayangimema endaweni ezehlukeneyo bethi ngizobatshayela ingoma zami ngoba zibahlaba umxhwele.
CL: Njengoba abantu bewuthakazelela umculo wakho, akutsho ngamafitshane ukuthi ukhangelele ukubenzelani lonyaka?
TM: Lonyaka ngikhangelele ukukhiphela uzulu elinye njalo idlalade elimnandi kakhulu. Okunye njalo ngikhangelele ukukhipha I-DVD ukuze abantu bazibonele ukudla kwamehlo njengoba behlala bengizwa ngendaba.
CL: Tshela umphakathi ukuthi wandise ukutshayela ngaphi ingoma zakho njalo ngaphandle kokucula msebenzi bani owenzayo jahelidala?
TM: Ingoma zami ngandise ukuzitshayela kuma-shows, emikhosini etshiyeneyo efana lemitshado kanye leminye imibuthano edinga ukujabulisa abantu. Okwakhathesi ngizitshaye nje ngikweleSouth Africa ngakho kwelakithi koMthwakazi ngizayatshayela khona ekupheleni komnyaka.
Ngaphandle kokucula mina ngiyasebenza lapha eSouth Africa ukuze ngithole imali yokuzithuthukisa kwezomculo.
CL: Akutsho Khabazela, bunzima bani oyake uhlangane labo njengomculi kamaskandi njalo nkuthazo bani oyipha abaculi abasasungula?
TM: Ubunzima engiyake ngihlangane labo yikuswela imali yokuzithuthukisa kwezomculo njengoba abantu besitshontshela umculo wethu bewuthengisa ngentengo ephansi. Okunye njalo yikuthi ngiculela elizweni elingasolakithi ngakho kuba nzima ukuthi ngingene emincintiswaneni yabaculi ngoba ngingaso wakhona. Lokhu kwenza ukuthi ngingatholi sicoco kwezomculo.
Inkuthazo engiyipha abaculi abasacathula yikuthi babambelele emculweni njalo bengaculi ngenxa yokuthi badinga udumo kodwa kabacule ngenxa yokuthi baleziphiwo zokucula.
