uMthunywa
Nkosilathi Sibanda
KUMAVIKI amathathu adluleyo iphephandaba ngelakuqala ukubika ukuba uRahman Kutsanzira usefulathele ithimu yezwe lonke, iHighlanders.
NgoLwesibili umdlali lo ukubeke sobala ukuthi usesayinile isivumelwano sokudlalela iFC Platinum.
Umdlali lo, ekhuluma loMthunywa uthe ngoMvulo ulubhekisa edolobheni leZvishavane elande ukuyaqala ukulolonga lentshantshu zeligi yeCastle Lager.
“Liqiniso lelo. UMthunywa wathola indaba eyiyo sibili. Sengitshiyane leHighlanders. Sengingumdlali weFC Platinum okweminyaka emibili elandelayo. Ngizizwa ngikhululekile ukuthi sengisuka kuqembu engakhulela kulo kodwa ngiyazi ukuthi ngizalikhanuka leliqembu,” kutsho umdlali lo.
URahman ubizwe ngemali efika i$20 000, imali ayengeke wayithola kuBosso.
“Okunye okungenze ngasuka kuBosso yimali engizayithola kuFC Platinum. Ngicabangisise kahle ngabona ukuba kungcono ukuthi ngiyedlalela imali ephezulu ngoba iminyaka yami kunguqu isitshovile.”
Ukusuka kuka-Kutsanzira akuzange kumangalise ngoba umdlali lo wabika ngomnyaka odluleyo ukuthi uzayifulathela iBosso.
Phakathi kwabo bonke abadlali beBosso uKutsanzira ubalelwa kulabo abathengwe ngemali ephezulu. UKutsanzira ngomunye wabadlali beBosso abadala obekuyibo ababambe isiko laleliqembu. IHighlanders yithimu ayidlalela engumfana omncane wayitshiya esiya kuCaps United waphinda wayiphendukela njalo kumasizini amane adluleyo.
Umdlali lo ubengomunye wabokaputeni beHighlanders kulisizini.
UKutsanzira wazise ukuba angeke akhulume ngaloludaba ngenxa yokuthi akavunyelwa ukuzikhulumela.
Ukusuka kwalumdlali kuvule isikhala eqenjini, okutsho ukuba abafana abasacathula bengene. Abalandeli beBosso basamelele ukuzwa ukuthi ngubani ozaqhatshwa kusikhundla sobuqeqetshi. EzikaMagebhula zilokhe zilinde ukuqedisa ingxoxo lomqeqetshi uMadinda ‘Khathazile’ Ndlovu. Umqeqetshi lo nguye okumele athathe indawo kaErol Akbay.