uMthunywa
Pumulani Mpofu
SIKE saxoxisana ngokuthi umuntu engenza njani ukuthi athole incwadi yokuzalwa. Lokhu kwakugoqela ukuthi uyabe ezalelwe ngaphi kungabe kusendlini, esibhedlela loba phandle kwelizwe. Nxa incwadi lezi sezithe zalahleka kuyabe kumele uZulu kaNdaba aqale aye emapholiseni abhale i-affidavit eyabe ichaza ukuthi walahla, kumbe watshontshelwa kumbe kwatshela endlini abe esesiyathatha ezinye njalo incwadi. Lokhu ngikutsho ngoba phela incwadi lezi zifuneka njalo ezindaweni ezitshiyeneyo. Ungahlala ungazilungisanga ube ususifa abayabe besele emhlabeni yibo abayasala lohlupho lokukulungisa lawo maphepha.
Nxa umuntu esethe walahla incwadi yakhe yokuzalwa, kuyabe kumele abuyele lapho ayithathela khona. Nxa ele-photocopy kumele ahambe layo kanye le-affidavit ayabe eyibhalile yadindwa ngamapholisa. Nxa engela photocopy kodwa wake wafunda kumbe waloba uGrade Seven kuyabe kumele adinge i-birth entry number esithupheni sakhe kumbe ayekhangela i-photocopy yencwadi yakhe yokuzalwa esikolo lapho ayefunda khona. Nxa kuyikuthi uyiswelile, uyahamba emahofisini kaHulumende akhangelane lokuthathisa ama-birth lama death certificate ayebhadala i $10 yokuthi bamkhangelele incwadi yakhe ebesebhadala eyinye i$5 yokuthi athole eyinye.
Nxa kuyikuthi uyijahile kuyabe kumele abhadale imali engange $10.
Nxa kuyikuthi kulahleke isithupha sezenge lese-plastic yi-$10 kuyabe kumele umalahla ahambe emapholiseni ayebhala i-affidavit echaza ukuthi walahla isithupha abesesiyathatha esinye isithupha. Nxa ele-photocopy yesithupha kumele ukuthi ahambe laso, nxa engela engahamba lenombolo zakhe zesithupha le-birth certificate lapho athathela khona isithupha sakhe sakuqala. Nxa umzali engelasithupha kayenelisi ukuthi ayethathela abantwabakhe incwadi yokuzalwa.
Nxa kwalahleka i-death certificate kuyabe kufuneka, i-photocopy ye-death certificate kumbe i-death entry number.
Nxa wayetshadile kuyabe kufuneka isithupha somtshado lomfelokazi kumbe umfelwa ebe ekhona nxa kusiyathathwa i-death certificate. Nxa i-death entry number ingekho le-photocopy ingekho kuyabe sekumele bahambe emahofisini kaHulumende ekhangelane lokuthathisa ama birth lama death lama I.D bayebhadala i-$10 yokuthi babakhangelele kuma-computer besebebhadala eyinye i$5 ukuthi bathole eyinye. Nxa beyijahile, kuyabe kumele bahlawule i$10.
Ngithanda ukuthi ngigcizelele lokhu. Nxa abantwana besiya esikolo bazali kuhle ukuthi amatitshala engacela incwadi zokuzalwa zabantwabenu lizihambise ngoba nxa isethe yalahleka incwadi yakho yokuzalwa kumbe eyomtanakho uyenelisa ukuthi uyecela i-photocopy kumbe i-birth entry number ubususiyathatha incwadi yokuzalwa. Kuhle nje ukuthi muntu ahlale elama-photocopy’ ukwenzela kuthi nxa engalahla incwadi zakho ukuthi athole ezinye. Loba nxa engalahlanga usufuna ukuyavula i- account ebhanga kumbe umntwana sesiyadingelwa indawo esikolo uyakhipha nje ku-file uhambise lapho eyabe ifuneka khona.
Asihlanganeni ngeviki ezayo
Umlobi uthinteka kukheli ethi [email protected]
Laku nombolo ezithi 0773195055/09- 881508.
