uMthunywa
Nkosilathi Sibanda
UMQEQETSHI weFC Platinum labadlali bakhe bafunga ijogwe bathi bafuna ukwandisa inkinga eqenjini leHighlanders abazadibana lalo emdlalweni wenkezo kazibuse ngoMgqibelo emini eMagumeni.
Umdlalo lo ngomunye owehlandla lama semifinal enkezo kazibuse. Komunye umdlalo, iDynamos izadlala leChicken Inn eHarare.
Bakhuluma ngokuzethemba ukuthi lonyaka iBosso izakhawula inkani ngoba ayisoke ibanqobe laloba kuwuphi umdlalo isizini ize ivalwe.
Kumidlalo emithathu lonyaka, iHighlanders iyehluleka ukukhwela phezulu kwezimbamgodi zeFC Platinum. Lapho eyanqoba khona, iBosso yaphuma ngembekwa kumdlalo weZNA Charity eBarbourfields.
NgoMgqibelo zombili zihlangana njalo eMagumeni, kumdlalo uNorman Mapeza umqeqetshi wezimbamgodi obika ukuthi kuzabancane indawo.
UMapeza uqaphise umsila ngoba uyitshayile iBosso 2-1 kumdlalo wesibili weligi yeCastle ngeSonto edluleyo.
“Besingazi ukuthi sizaphinda sihlangane layo futhi iHighlanders masinyane kanje. Ithimu yami ihlezi ilinde ukuzotshaya iHighlanders egumeni layo.
“Ngendlela abafana bami abamelele ngayo ukuzodlala eBarbourfields, ngiyabazwela abazwela abeHighlander.
Akula phela ukuthi unqobe eqenjini elitshisa njenge leFC Platinum. Loba kunjalo, angeke siyithathe kancane
iHighlanders ngoba idlalela ekhaya njalo ilimele ngokudliwa yithi,” nguMapeza lo ekhuluma loMthunywa kuliviki.
Umdlali kaMapeza othenjiweyo esiswini uWinston Mhango uthe okwenza babelomdladla wokuphinda umphehlo kuBosso yikuthi bakhwabitha ukudlalela emagumeni.
“Sesananzelela ukuthi nxa sidlala eBarbourfields sidlala kuhle. Kubalula ukuthi sikhabelane ibhola kulenkundla njalo nxa sidlala ngokuthanda kwethu, loba yiphi ithimu siyayinqoba kuphela. IHighlanders sihlangana layo ngemva kwamalanga amahlanu ngemva kokuyinqoba kuligi, lokho kusenza sibeledlabuzane.”
Izimbamgodi ezilakho ukuphazamisa iBosso zibalisa uNqobizitha Masuku, Gerald Takwara, UWalter Musona,uMarshall Mudehwe, uBrian Muzondiwa loObrey Chirwa.
Umdlali weBosso okukhanya eledlabuzane lokulahla kulezinsuku uBruce Kangwa usethembise abalandeli ukuba lonyaka inkezo kazibuse ngeyabo.
“Njengabadlali beqembu elikhulu elizweni njalo elilembali kwezenguqu, sinanzelela ukuba silomlandu kubasekeli bethu yikho lonyaka sisithi abalandeli bethu sizabajabulisa ngenkezo le,” kutsho uKangwa.
“Akukho lula ukudlala leqembu elikhulu njenge FC Platinum, kodwa sizazama ukusukumisa abalandeli bethu.”
Umqeqetshi weTshilamoya uErol Akbay uthe: “Okwamanje asingeke sikhulume ngokuthatha inkezo ngoba kusamele sigxile kumdlalo esilawo kuma-semifinal. Kuyatholakala ukudliwa kwethu kwangeSonto kodwa sikufaka emuva.”
Kusenjalo umaqhuzu wenhlanganiso yePremier Soccer League uKennedy Ndebele utshele uMthunywa ukuba imidlalo yonke yeligi yeCastle ayikho kulimpelaviki.
UNdebele uthe amaqembu azadlilwa kuhlandla lama- semifinal angempelaviki azadibana kudingwa ithimu ezakuba yintshantshu yesithathu, enkundleni yeWhite City ngoMvulo.
