uMthunywa
Wayne Ncube
“MINA ngilondofa omncane okuthiwa ngu “Nana” kangidubeki ngitsho mina ngokudla, ngidla loba yini ebabayo engiyifunayo ngoba laye undofa wami uthanda ezimnandi ezibalisa irayisi labo-macaroni, kadli isitshwala.”
La ngamazwi elinye inina elichaze phambi kwabaphurofethi kanye lomphakathi obubuthene eSt Elizabeth eMbembesi kuncediswa abantu.
Inina leli okutholakale ukuthi nguMaNcutshana nje kuphela libikele umphurofethi obevakatshele endaweni le kuyonale iviki ukuthi lilondofa omncane, okuthiwa nguNana, inyoka okuyilumisa ngayo abantu kanye lophondo.
Ku-audio esezandleni zikaMthunywa uMancutshana uchaza ukuthi usebenzisa abantwana bakadadewabo kanye labanawakhe ukuthi bayothengisa umzimba balethe ukudla ukuze undofa wakhe adle.
“Undofa wami lo ngamthenga ngembuzi ezimbili komunye oyisikhulu sethu. Omunye umngane wami wathenga owakhe nge-$400 kuminyaka emibili ama-bond esathenga sibili.
“Undofa-ke yena uyahamba laye ayengithathela i-grocery emazweni ukuthi mina ngizokudla,” kuchaza uMancutshana.
UMphurofethi uMaDlamini uthe abantu bathenga izinto ezesabekayo ukuze bathole inotho.
“Kukhanya inina leli ladinga undofa lo ukuze athole ukudla okunengi, thina lapha sizosiza abahluphekayo abasetshenziswa bengakwazi,” kutsho uMaDlamini.
Inina leli liphinde laveza njalo ukuba lafaka umnewabo kanye lomntanakhe isifo sokuwa ukuze bamsebenzele.
“Umfowethu ngamgaxa isifo sokuwa ngamfakela umuthi okuthiwa ngumabandamu, isihlahla lesi siyabulala kodwa angazi ukuthi yena samehlula njani, ngazodlisa umntanakhe umuthi lo elele. Ngiyaxolisa, ngakwenza lokhu ngoba ngifuna inotho qha,” kulandisa uMancutshana.
