uMthunywa
EKUKHULENI kwami ngananzelela ukubana omama yibo abandise ukugcina abantwana laloba obaba sebethe bayasebenzela ngaphandle kwelizwe besiya emazweni afana labo Bhilithani kanye laseGoli. Izikhathi ezinengi nxa imitshado isithe yachitheka loba abazali sebethe babhubha abantwana bandise ukusala begcinwa ngomama loba yizihlobo zabomama.
Lokhu babekwenza ngoba benanzelela ukubana izihlobo zabomama yizo ezinganakekela abantwana ngendlela ephakemeyo njalo elesisa ukwedlula izihlobo zabobaba. Ukuhamba kweminyaka lezinsuku sokudale ukubana kube lochuku ebazalini ikakhulu kubomama njalo lokhu sokudale ukubana kube lokudonselana phakathi kwezihlobo njalo abantwana bacine sebedubeka okwamagama. Inengi labomama kalisaphitsheki ngokukhulisa abantwana babo kodwa sebebatshiya kuboyise loba nje ingane isase lusane olusadinga uthando lukamama njalo lokumunyiswa ukuze bakhule ngendlela ehlambulukileyo njalo ebavikela emikhuhlaneni eminengi.
Kule iviki ngithole ithuba lokubana ngixoxisane labazali abanengi abahamba ngendaba ezimayelana lencwadi zokuzalwa. Kubo bonke abazali engixoxisane labo ngithintwe kakhulu ludaba lukababa okuthiwa nguNdlovu.UNdlovu wayesebenzela eGoli ngomnyaka ka -2008. Ekusebenzeni kwakhe eGoli wahlangana lomunye usisi okuthiwa nguSikhathele bathandana okwesikhatshana waze wacina esebambe isisu. UNdlovu wala ukumthatha uSikhathele ukuba abe ngumkakhe ngoba esithi yena ngazake athathe umuntu abakade bangazani okuyangaphi. USikhathele wabeletha indodana okuthiwa nguSimphiwe. Wamgcina okwenyanga ezintathu waqeda wayamtshiya kuNdlovu ethi yena abazali bakhe bathi ngeke akhulise igola elilobaba ongaziwayo.
UNdlovu laye wemukela umntwana kodwa-ke wayengeke amgcine ngoba laye engazi ukubana usane lunakekelwa njani.UNdlovu wathatha usane kanye lencwadi zazo zesibhedlela wamthumela ngomalayitsha ukubana bamuse kugogo ozala uyise ukubana amgcine. Wakhula-ke umntwana waze wagqiba iminyaka eyisikhombisa waya-ke lesikolo.Uhlupho osolukhona yikubana kufuneka incwadi yokuzalwa kukaSimphiwe. UNdlovu waphenduka-ke eZimbabwe ethi azothathela incwadi yokuzalwa komntwana wakhe kodwa-ke kaphumelelanga ngoba umthetho usithi incwadi yokuzalwa ithathwa nxa umama ekhona loba kulesihlobo sikanina.Ububi obukhona yikubana uNdlovu kazi ukubana uSikhathele uzamthola ngaphi njalo kazi lezihlobo zakhe .
Izehlakalo ezifana lalezi yizo ezidala ukubana abantwana bacine bekhula bengelawo amalungelo abo eneleyo.
Kulusizi ngoba uNdlovu kuzamele amdinge uSikhathele aze amthole ukuze athathele uSimphiwe incwadi yokuzalwa. Isifiso sami yikubana abantu bakubone ukuqakatheka bokwazisisa intombi lingakacabangi ngokubana lenze ezocansi ngoba yizo kanye esezidala ukubana abantwana balahlekelwe ngamalungelo abo ngenxa yamaphutha abazali babo.
Kasihlanganeni njalo kuviki elizayo.
Umlobi utholakala kukheli ethi [email protected] loba kunombolo ezithi 0773195055.
