uMthunywa
Ethel Ncube
ABALIMI kuleli bakhuthazwa ukuba banakekele izifuyo zabo ikakhulu ngesikhathi lesi esomqando ngoba bacina belahlekelwa yizifuyo ngenxa kokuswelakala kwamanzi kanye lamadlelo.
UMnumzana Cosmas Muzunde onguLivestock Specialist esigabeni seMatabeleland North uchaze ukuba isikhathi somqando silohlupho kakhulu ngoba utshani buyasilela.
“Isikhathi esikuso sinzima kakhulu kubafuyi ngoba amanzi ayahlupha njalo lezifuyo zilakho ukufa ngenxa yomqando.
“Ngikhuthaza abalimi ukuba bakhangele amathole, amazinyane kanye lezimvu kungangenwa ngumqando. Kumele bafake amazinyane kanye lamathole endaweni ezikhudumalayo ngaso sonke isikhathi,” kulandisa uMnu Muzunde.
Uqhubekele phambili wathi amadlelo malutshwane khathesi kungakho izifuyo kumele bazivalele ezibayeni baziphe ukudla lamanzi.
Uphinde njalo wacebisa abalimi ukuthi bathengise izifuyo ezindala.
“Njengoba amadlelo emalutshwane abalimi kumele bathengise inkomo ezingasazaliyo basale lalezo ezizabalethela inzuzo.
“Lezo ezinikwa ukudla kumele zihlale endaweni engelamkhuhlane njalo zihanjiswe edibheni ukuze zingabi lemikhaza. Imikhaza ilakho ukuletha imikhuhlane ezifuyweni,” kutsho uMnu Muzunde.
Uphethe ngokuxwayisa abalimi ukuthi bangekeli inkomo zisidla duzane kwemigwaqo.
“Abalimi kumele baqaphele izifuyo zabo zingadleli duzane kwemigwaqo njalo bazivalele ukuze zingantshontshwa,” kuphetha uMnu Muzunde.
