uMthunywa
IBhayibhili incwadi eNgcwele ithi hlonipha uyihlo lonyoko ukuze insuku zakho zande ezweni. Eqinisweni ungawulandela lumthetho uyaphila mnandi ezweni, akekho oseke wahlukumeza abazali bakhe waphila impilo enhle isikhathi eside.
Bakhona abanye abazali abathi loba usubenzele okuhle kangakanani bangakholwa, ngikhumbula omunye umngane wami ongumbalisi uhlala ekhala ezimathonsi ngoba ethi unina wasukuma phambi kwebandla kulabafundisi ababevela kwezinye izigaba ethi yena uyahlupheka kazalanga wabola amathumbu.
Unina usuka akhohlwe ukuthi umumo wezomnotho awumanga kuhle ezweni lakithi, ekupheleni kwenyanga inye ngayinye umngane wami uyathengela unina amafutha okupheka, impuphu, itshukela lakho okunye nje okuyabe kufuneka aphinde laye anakekele imuli yakhe.
Unina useze exabana lomalukazana wakhe, unkosikazi wendodana yakhe ngoba laye esenyampe inhliziyo ngenxa yokungasuthiseki kukaninazala, wawuzwe nxa sebemnyeya bebodwa bethi uduba ngokudla esesulela phansi njenkukhu.
Bathi kwezinye izikhathi angathanda nxa kulemidlalo uyazigqokela amadabudabu, abe manikiniki azenze umuntu ohawulayo. Singakhohlwa ukuthi lathi singabazali labantwabethu kusamele banakekele imuli zabo ngokugcweleyo, lapho lathi nxa besikhumbule sihlabe phansi ngedolo sibonge singakhononi ngoba ngokukhonona simvalela inhlanhla.
Esikhathini esinengi ngiyangizwe ingxabano umamazala esezondele umalukazana ukuthi uvuleleni impahla ezivela eGoli kundodana yakhe, uyabe efuna ukuthi kuvule yena abenguye owabela umalukazana, umalukazana laye ale athi zivulwa nguye ngoba zivela kumkakhe.
Ngithemba libe losuku oluhle lwabomama.
Ayixabene.
