uMthunywa
Tina Tshidzanani T. Malaba
NDAKAKAMUTETEDZA kulubahhe. Bunji makakon’wa, kene makaletja zwenyu mwaza tizi? Ndoboka bakazwipila bakabhatana nebamwe bakabe mulubahhe.
Unkumbulo mbuyanana unohaka baakanya banhu kuti bawhisise kakale balinge pabamile. Kwazo mitjelo, nefumwa imu ntunhu. Kozuwiwa butjenjebvu nezwidiya, hinga kwemakhansili edu, zwinotimanyikanya zwinohaka kumbudziwa Hulumente, lulimi nemipanga yedu. Nemafupi bana BeBulilima neMangwe bake bepana mano angabapa nkumbulo mpabi bakabona zwimbeli.
Banhu bakanyikwedu mose, poni naponi pamuyapo muna mano nebutjenjebvu gwamakapiwa neNdzimu. Ngono ape tisingawakobelane, tisingagale pasi nebawhola, tingabaakana kene? Lubahhe gohaka bohe, kuti batipe mano.
Batibudze nezwabanoyemula kuti zwitiwe nebanhu bamumitunhu yabo. Kohakika butjenjebvu gwabo Councillor nabo MP nabo Senator nebatungamili baHulumente. Kuti batibudze kuti todziyililani tinda kuGwanda nekwema-passport. Todziyilani nebaakanya lulimi gwedu kuti gungine mukwele dzimwe ndimi dzilibontigwa. Tohaka bulubi gwebemabhizimisi tibalayidze zwatinoyemula. Bedzi supermarket nebe bedzi-cellphone baponi? Bazwadzi bedu bakatshila mahhitanda malefu mumizi kuti babhate network yakanhomwe. TV neRadio yamuno abatoyiziba.
Titi tjete koga? Badiyi bedama leNdzimu banokumbudziwa kuti bambe njimbo kakale basumikile nelulimi gunowhika nebanhu.
BaKalanga mubatungamili banotjenamisa muhango yose yeZimbabwe nakuhhe kwayo. Ndimwi munabugalo gupehhugwi. Lubahhe gokumbila tjinhu tjin’ompela — “MANO” enyu koga! Nemano ndobvuma tingabaka tjaba tjedu tjisipalale. Nofi inobhatshanya banhu — lulimi. Kumwe kose kobhata kuletja. Zwimwe zwatingathama wubhatana kumeho koga. Babili bangazuwa tjini basingalebeleke, bangabvumilana tjini basinga whanane. Bangawhanana tjini mwe alinlanda wemwe.
Mwana nenlanda kene boda abangalizane. Koga bana babili mwe anakanyi kwabo nemwe anakanyi kukwe bakalizana. Banozana bakalizana. Ayizwisununguleni mubulanda tibenakanyi kubuKalanga. Ndizo tizibe zuwisana nebamwe takalizana.
Ndebo mbuya yebuhe gweNdzimu inotibudza kuti nsi wePentekosite banhu bakatjenama bewha ndimi dzabo dzilebgwa neBagalili bakati: “Ini ngono mwe nemwe wedu ewha mwe nemwe wabo elebeleka nelulimi gugwe? Tobawha beleba makaabadzo eNdzimu nendimi dzedu!” Mihingo 2:8, 11. Mwaza yeNdzimu — atikuwhisiseni.
Kalanga Language and Cultural Development Association inomukumbudza lulimi nemabvilo enyu. Pamazwiziba munde kulubahhe munopana mano nebamwe tizwibaakanye.
Kwanasi musale! Ndimi Tshidzanani Malaba — Thobela. Bagudu baNjelele, batombo tjisipotelekwe.
Kalanga Language and Cultural Development Association
