MADINDA, MADINDA, MADINDA!

23 May, 2019 - 00:05 0 Views
MADINDA, MADINDA, MADINDA! Madinda Ndlovu

uMthunywa

Nkosilathi Sibanda

KUMDLALO kanobhutshuzwayo, ukudlala kweqembu kubuzwa kumqeqetshi kuphela.

Kodwa ngokuma kwezinto kuqembu leHighlanders, kukhanya ukwehluleka kwayo enkundleni sekuphoselwa ebantwini abangela lwazi lokuqeqetsha kumbe lokucebisa abadlali ukuthi ibhola likhatshwa njani.

Endaweni yokuthi kudingwe impendulo kumqeqetshi uMadinda Ndlovu, sekudingwa icala kubhodi, i-executive lakuzisebenzi zeqembu ezisemahofisini ezingazi lutho ngenguqu.

Sekudlule amaviki ayisitshiya galombili iqembu lakoBulawayo leli lingatholi lutho egumeni lalo. Lalapho nxa lithe lavakatshela kwezinye inkundla, akuphumi lutho. 

IBosso izihlalele ekucineni kwengalane yeligi yeCastle Lager lemiklomelo emine nje.

Ngokutsho kukaNdumiso Gumede umongameli weHighlanders, leliqembu alikaze lidliwe kanje kuminyaka engamatshumi amane lokhe lasungulwayo.

Kungumbono wenengi labantu ukuthi konke okuhlupha iHighlanders angeke  kube sensitha. 

Inkinga yeBosso isenkundleni, okutsho ukuba uhlupho lwaziwa ngabadlali lomqeqetshi.

Kubikwa ukuxabana kwabadala kulesandla esithile kunkinga lezi kodwa akumelanga abantu bakhohlwe ukuthi ibhodi le-executive ayisibo abakhaba ibhola. 

Aluba abafana abaholi, ngabe sithi ayikhale kubadala laba. Abadlali baholiswa yinkampani yeNetOne njalo imali abayiholayo abasoli lutho, pho kwehlulani ukuthi bajabulise inkulungwane zabantu ababhadala maviki wonke ukubukela ibhola labo.

Okwenza sibelemibuzo engapheliyo kuMadinda kungoba usecatshe ngomunwe kwaze kwacasula ngitsho lomuntu ongasekeli iHighlanders.

“Sengiphekile ngaze ngaphelela,” yiwo la amazwi kaMadinda mhla esehluleka ukuhlohla bedlala leqembu leHerentals.

Omunye umlandeli weBosso uthe kudingeka ukuba umqeqetshi abukele umdlalo wabafana bakhe ehleli labasekeli.

“Nxa kusenza, kungaba njani ukuthi uMadinda okwelanga elilodwa, abukele iqembu ehleli labasekeli, mhlawumbe engabona angakaze akubone nxa ehlezi ebhentshini.

“Kunengi esikubonayo yena angakuboniyo lanxa engathi thina kasazi lutho ngomdlalo wenguqu kodwa njengabasekeli kasisoze sekele  ukukhumbuza lumqeqetshi ukuthi konke kuqala ngaye njalo kucina ngaye nxa kukhulunywa ngendlela iqembu elidlala ngayo,” kutsho umsekeli weBosso lo.

Kulimpelaviki ithimu yezwe lonke idibana leTelOne, abanye abafana abatsha abalakho ukuthi bamthele ezitshisayo futhi uKhathazile.

Kulumdlalo uMadinda lethimu yakhe abaqaphele ukuthi benganqotshwa kumbe ukuphetha bengutshiki lobhanqa.

Kungenzakala ukuthi usiyaphela lumdlalo nxa abafana bakaMadinda bangehluleka ukubopha ziqine mhlawumbe kungahle kube yikuchitheka kwamanzi angabe esabutheka.

Amandla onke asezandleni zikaMadinda ukuthi alaye abafana bakhe ukuthi balikhabe njani ibhola ukuze baphume enkundleni bejabula okwakuqala kule isizini.

“Akulaqembu elibotshiweyo,” njengokutsho kuka-Ariel Sibanda unozinti omkhulu.

Abalandeli abanengi bakholwa ukuthi uMadinda angatshintsha indlela enza ngayo umsebenzi angaphumelela njengalokhu ayekwenza eseBotswana.

Bathi imbali yakhe izahlonitshwa nxa engenelisa ukunqoba  ekuHighlanders, iqembu elamenza waba ngumqeqetshi ohlonitshwayo.

Ayilale ngenxeba, njengoba besitsho abalalandeli bayo.

Imidlalo yeCastle Lager kuliviki:

NgoMgqibelo:

-Chicken Inn vs Black Rhinos (Luveve Stadium)

-Yadah vs FC Platinum (Rufaro Stadium)

-Herentals vs Chapungu (NSS)

-ZPC Kariba vs Mania Diamonds (Nyamhunga Stadium)

NgeSonto:

-Hwange vs CAPS United (Colliery Stadium)

-Dynamos vs Ngezi Platinum (Rufaro Stadium)

-TelOne vs Highlanders (Barbourfields Stadium)

-Triangle United vs Bulawayo Chiefs (Gibbo Stadium)

-Mushowani Stars vs Harare City (NSS)

Share This:

Sponsored Links