uMthunywa
YiNtatheli kaMthunywa
ABALIMI beBinga besebenzelana lenhlanganiso yeBasilwizi Trust baphakathi kokufuya inhlanzi, iphurojekithi abathi ilula ukuqhuba nxa abalimi bethole ulwazi olufaneleyo. Phezu kwalokhu bathi ukufuya inhlanzi kuletha inzuzo enhle.
UMnumzana Killion Mudimba onguProject Assistant kulinhlanganiso uthe iBasilwizi Trust yakhele isigaba seBinga amachibi enhlanzi amabili lapho izakhamizi ezizaqoqana zisebenze zingamaqembu abantu abangu-25.
UMnu Mudimba ubike ukuba ukufuya inhlanzi kungumsebenzi olula nxa umlimi engathola ulwazi olufaneleyo ngokufuya lokuphathwa kwenhlanzi.
“Okumqoka nje nxa umlimi esungula liphurojekithi yikuthi aqale athole ulwazi olufaneleyo oluphathelane lokuthi ziphathwa njani njalo zidlani.
“Okunye ukudla kwenhlanzi abalimi benelisa ukuzenzela ngokuthatha umquba bawufake emasakeni besebethela amanzi kulawo masaka ayabe elomquba.
Lokhu kuyabe kusenzelwa ukuthi umquba lo wenze umhluzi ozaba yikudla kwenhlanzi.
“Ezikhathini ezinengi lowo mhluzi ujayele ukuba lombala oluhlaza okwamahlamvu,” kutsho uMnu Mudimba.
UMnu Mudimba uqhubekele phambili wathi umlimi uyenelisa ukusebenzisa ukudla lokhu okuyabe kulungiswe ngomhluzi womquba esengezelela ekudleni okuthengwayo (supplements).
Iphephandaba likazulu lizwe ukuba injongo yeBasilwizi ngeyokuba izakhamizi zeBinga zenelise ukufuya inhlanzi bazithengisele amadolobho aseduze leBinga.
“Thina njengeBasilwizi sifisa ukuba abalimi bethu benelise ukufuya inhlanzi bazithengisele abantu abazifunayo abasemadolobheni aseduze kulokuthi abantu abadinga inhlazi bayethenga eKariba.
“Okwakhathesi abalimi bethu bafuya inhlanzi ukuze bathengisele abanye abafuna ukuzifuya.
Inhlanzi iyenelisa ukubekela amaqanda angafika i9 000 kusiya ku10 000 ngemva kwenyanga ezintathu.
“Yiloba zingaphili zonke ngemva kwesikhatshana nje ziyabe sezigcwele inhlanzi kungakho-ke lo ozifuyileyo kuyabe kumele azithengisele abanye,” kutsho uMnu Mudimba.
UMnu Mudimba uphethe ngokuthi bonke abalesifiso sokufuya inhlanzi kumele baqale bayekwenza izifundo zokuzifuya ukuze bangakhali kusasa ngoba inhlanzi zifuna ukunakekelwa ngendlela eqondileyo ukuze umlimi angalahlekelwa sezifile.
