uMthunywa
Blessing Moyo
INHLANGANISO ebona ngezokulima eye-Agritex isikhuthaze abalimi bengqoloyi kundawana zonke zelizwe ukuba baqalise amalungiselelo okulima ingqoloyi ukuze bangatshiywa yisikhathi ngoba kucina kubangela ukuthi isilimo lesi sonakale sesificwe lizulu silokhu sisemasimini.
Ekhuluma loMthunywa uMnumzana uSipho Ndlovu onguAgricultural Extension eMguza Peri-Urban uthe igqoloyi ilinywa kusukela ekuqaleni kukaNkwenkwezi.
“Abalimi sokuyisikhathi sokuba balungiselele ukulima ingqoloyi ngoba iqala ukulinywa ekuqaleni kwenyanga kaNkwenkwezi kusiya ekuqaleni kwenyanga kaNhlangula.
“Lokhu kubalulekile ukuthi abalimi bakubambe ngoba bangavele badlulise isikhathi sokuhlanyela lesi, ingqoloyi ingacina isitholwa lizulu yonakale ingakavunwa,” kutsho uMnu Ndlovu.
“Abalimi sibakhuthaza ukuba benze amalungiselelo abo kuhle bengajahanga khathesi ukuze bathole ithuba lokukhangela impahla yabo nxa sebeyibuthelele ukuthi iyenela yini indawo abafisa ukuyilima.
“Umhlabathi kumele lawo uhlale ulungisiwe usulinde nje ukuthi inhlanyelo ifakwe phansi, umlimi angakwenza lokhu ngokuqala aphendule umhlabathi wakhe ngoba lokhu kuzakwenza benelise ukuthi bafake inhlanyelo phansi ngesikhathi esiqondileyo.”
Ingqoloyi
Uphethe ngokuthi wonke amalungiselelo angenziwa ngesikhathi esiqondileyo abalimi balakho ukuthola isivuno esihle yikho nje bekhuthaza abalimi ukuba balungiselele kusaselesikhathi.
“Abalimi kumele babone ukuthi balefethalayiza yakuqala efakwa ngesikhathi efaka inhlanyelo yakhe phansi.
“Kuqakathekile ukuba umlimi wengqoloyi ahlale ekhulumisana labalimisi ukuze athole ulwazi kanye leziqondiso mayelana lokulima isilimo lesi,” kuphetha uMnu Ndlovu.
