uMthunywa
Cornelius Luphahla
LONYAKA abahlabeleli kanye labadlali bathi baza lezinambithekayo kuphela nanko phela abanye bathembisa amadlalade amatsha kuthi abanye bathembisa ukukhiphela uzulu amavidiyo engoma zabo.
UMthunywa uxhumane loGqishamnkantsha umculi kamaskandi, uThandazani Nyoni obemele uMartin Sibanda owe-rhumba, uMadlela Skhobokhobo ongumdlali wodumo abuye abe ngumculi we-rhumba kanye loSarah Mpofu ongumdlali wobulingisi abaveze abakukhangeleleyo lonyaka.
UMthunywa uxhumane loMqondisi weqembu le-rhumba elikaMartin Sibanda and the Ndolwane Super Sounds uThandazani Nyoni wathi lonyaka baphekele uzulu ezimnandi kuphela.
“Lonyaka iqembu leNdolwane eliholwa nguMartin lipheke idlalade lomhlaba elizahlabekisa uzulu njengelithi Bakhuzeni. Lelidlalade lithi Konke Sizokulungisa njalo sizalikhipha emphakathini ekuqaleni kukaMbimbitho.
“Okunye njalo lelidlalade lilengoma eziyisithupha njalo mhla liphuma lizabe litholakala indawo zonke kuleli kanye laphetsheya ukuze abantu bonke balithole ngobunengi. Ngalokhu abalandeli kabahlale belindile ngoba kuza okukhulu,” kutsho uThandazani Nyoni.
Ekhuluma lentatheli umculi kamaskandi wodumo uGqishamnkantsha uthe uzulu kalindele idlalade elivuthayo lonyaka eledlula leli alikhiphe kumnyaka ophelileyo.
“Mina ngithi uzulu kangadeli kalindele idlalade lami elivutha amalangabi engizalikhipha ekupheleni kwawonalo umnyaka. Njengomculi odume ngezimnandi kuzulu ngithi lelidlalade elizayo lijonge ukumjabulisa njalo kangikhathali ngizaqhubeka ngimjabulisa.
“Okunye njalo ngizaqhubekela phambili ngijabulisa abalandeli bami ngama-shows ukuze bazibonele ukudla kwamehlo bangabi bengizwa ngendaba,” kutsho uGqishamnkantsha.
UMadlela Skhobokhobo uthe lonyaka uzakhipha idlalade lengoma kanye lelomdlalo wakho uqhubekela phambili.
“Lonyaka ngikhangelele ukujabulisa abalandeli ngengoma engizayikhipha ngoNhlolanja ethi iBheyapeya. Ngemva kwalokho ngoMabasa ngizabakhiphela njalo idlalade elipheleleyo elomculo werhumba.
“Kwezobulingisi ngizabakhiphela UMadlela 4 ukuze baqhubekele phambili bejabula ngemidlalo yami,” kutsho uMadlela Skhobokhobo.
Umdlali wodumo kwezobulingisi uSarah Mpofu uthe yena uzakhiphela uzulu imidlalo eminengi njalo ukhangelele ukuphakamisa ikakhulu abesifazana.
“Mina lonyaka ngithi abantu kabalindele imidlalo emnandi etshiyeneyo kusiyaphela umnyaka. Okunye njalo ngikhangelele ukuthuthukisa abesifazana ikakhulu abasebenza ukuthokozisa uzulu kwezomculo, ezobulingisi, kwezokuloba kanye lakwezenkondlo ukuze baqhubekele phambili besenza umsebenzi lo,” kuphetha uSarah Mpofu.
