uMthunywa
Thokozile Mbedzi
INHLANGANISO yeAgritex ikhuthaza abalimi kundawo zonke zelizwe ukuthi balondoloze amanzi emasimini abo.
Ekhuluma lentatheli kaMthunywa uMatabeleland North Provincial Agritex officer uDumisani Mbikwa Nyoni uthe bahlomisa abalimi ukuba balondoloze amanzi.
“Abalimi kundawo zonke zelizwe sibakhuthaza ukuthi balondoloze amanzi ngokuvimba amanzi. Lokhu bangakwenza ngendlela ezitshiyeneyo.
“Indlela yokulima imfolo layo ngeyinye encedisa abalimi ukuba balondoloze amanzi ngoba amanzi ayabe engena emfolweni engasagelezi wonke esiya phandle kwamasimu,” kutsho uMnu Mbikwa Nyoni.
“Abalimi kumele bagebhe amagodi ngamakhuba lokhu esesikubiza ngokuthi yiNtwasa. Lokhu kuyanceda ukuba amanzi angene phansi alondolozeke izilimo zithole amanzi eneleyo.
Ukhuthaze abalimi kundawana zonke ukuthi balandele indlela lezi zokulondoloza amanzi njengoba sikhangelane lesigaba sokulima esilezulu elilingeneyo.
“Kuqakathekile ukuthi abalimi balandele indlela zokulondoloza amanzi ukuze babe lesivuno esiphezulu kusigaba sika-2023/2024.
“Njengoba ababona ngezomumo womkhathi sebetshilo ukuthi singathola izulu elilutshwana loba eleneleyo kungakho kumele abalimi bazi indlela zokulondoloza amanzi ngazo zonke indlela ukuze bathole isivuno esiphezulu,” kutsho uMnu Mbikwa Nyoni.
Uphethe ngokuthi abalimi bahlanyele inhlanyelo eziphangisa ukuvuthwa.
“Abalimi abalima umumbu kumele balime inhlanyelo eziphangisa ukuvuthwa njalo ezivuthwa ngamalanga angu-90,” kuphetha uMnu Mbikwa Nyoni.
