uMthunywa
Christabel Matemera
KULENINA lelokitshini leMakhandeni koBulawayo eliziphilisa ngokufuya imvundla kulandela ukuhlala isikhathi eside lingasebenzi futhi umkalo engaliphathisi.
UNkosazana Zandile Ncube olabantwana abahlanu uthe waqalisa ukufuya imvundla ngomnyaka ophelileyo ngemva kokunanzelela ukuthi kwakunzima ukunakekela abantwana.
Imvundla ngesinye sezifuyo esasingavamanga ukufuywa ngabantu kodwa ngenxa yokunanzelela ubunandi benyama yakhona lokuthi iyaphangisa ukuzala abalimi abanengi sebeziphilisa ngokuyifuya.
“Ngananzelela ukuthi ngasengidonsa nzima konke kukhangele mina ngingasebenzi njalo lomkami laye engazihluphi ngokungincedisa ukuselela abantwana.
“Ngasengicabangisisa ukuthi kungcono ngizifuyele imvundla ngoba kayilandleko ezinengi zemali yokudla. Imvundla izidlela utshani loba amahlamvu embhida lekhabhitshi okungadingi imali.
Amahlamvu amakhabitshi ngiyazihambela emakethe ngiyezidobhela ngizonika imvundla yami.
“Kukanti utshani obuluhlaza sibuthola egangeni, kwesinye isikhathi ngiyahamba eKelvin lapho okudutshulwa khona amaputi ngifike ngizidobhele atshiywa ngabantu,” kuchasisa uNkszn Ncube.
Uqhubekele phambili esithi ibhizimusi yakhe ihamba kuhle njalo usesenelisa ukuziphilisa lemuli yakhe.
“Imuli yami layo kayisadubeki isitshebo ngitsho, kukanti ngingathengisa imvundla yami ngiyenelisa ukuyabhadalela labantwana imali esikolo.
Ukhuthaze ezinye izakhamizi ukufuya imvundla ngoba kungahluphi njalo akudingi indawo enkulu yokuyigcinela.
“Imvundla kayidingi indawo enkulu yokuyigcinela. Labantwana bakhona labo bayaphangisa ukukhula okwenza ibhizimusi ihlale iqhubeka,” kuphetha uNkszn Ncube.