Liyakhula iqembu amaBlessa Amahle

07 Dec, 2023 - 00:12 0 Views
Liyakhula iqembu amaBlessa Amahle AmaBlessa Amahle

uMthunywa

Ethel Ncube

AMAJAHA adabuka eManasa eLupane asevule iqembu lawo elihlabela umculo kamaskandi liseMzansi Afrika.

Iqembu leli elibizwa ngokuthi amaBlessa Amahle likhokhelwa nguWillard Moyo ehamba loElse Mongameli Moyo. Ababili laba baqala ukuhlabela ngo2018.

UMthunywa uxhumane lomkhokheli weqembu leli, uWillard Moyo obike ukuba iqembu labo selakhipha amadlalade ambalwa.

“Siqale ukuhlabela ngo-2018 sakhupha idlalade elithi Ngoma yami, kuthi 2020 sakhupha i-single track salandela ngelinye idlalade ngo-2022 elithi Waze Wakhathazeka. Ingoma zethu zikhuluma ngempilo njalo ziyakhuthaza zibuye zikhuze ziphinde ziduduze. Iqembu lethu leli saliqala lomfowethu khathesi selikhula ngoba lonyaka umnyaka ungakapheli sikhangelele ukukhipha elinye idlalade,” kubika uWillard.

Uqhubekele phambili eveza ukuba iqembu lakhe selizaqala ukusabalala ukuze laziwe.

“Sikhangelele ukusebenza nzima ukuze ingoma zethu zaziwe ngabantu umhlaba wonke. Sikhangelele ukusebenza nzima sigcwale kundlela zonke zokuxhumana. Okunye njalo esikhangelele ukukwenza yikungena kumiqhudelwane yezicoco ukuze sifunde ukuthi abanye abaculi benza njani ngezomculo. Ukuhlabela kwethu siseMzansi siyabe siphakamisa kithi lapho esivela khona kungakho abakithi kumele bazithole ingoma zakithi bazilalele baziqhenye ngathi,” kuphetha uWillard.

Share This:

Sponsored Links