uMthunywa
EZIMNANDI angithi nje zidume ngephaphandaba likazulu ngenhloso yokujabulisa umphakathi. Ngalokhu kalideli ukumjabulisa nanko phela kule iviki liye layathutsha lengqungquthelo yezomculo kamaskandi engena kudume uladuma.
Ingadlangadla le, nguFitwell Sibanda ijaha eliphatha isiginci kuphume uluju emlonyeni. Nguye umholi weqembu elibizwa ngokuthi LiBhubesi lakwaWatata. Othanda ukuzijabulisa kule iviki nansi ingxoxo enambithekayo phakathi kwentatheli yephephandaba likazulu uCornelius Luphahla (CL) lomculi wodumo lo uFitwell Sibanda (FS).
CL: Akuthi fahlafahla jaha lakithi mayelana lembali yakho kanye leyomculo wakho?
FS: Mina ngazalelwa esigabeni seNanda eTsholotsho okuyikho engakhululela khona. Izifundo zami ngaziqalisela eNanda Primary School ngaze ngayaqeda khona ugiredi 7. Ngaqhubekela phambili ngayafunda eNemane Secondary School ngaze ngayaqeda ufomu 4.
Ezokucula ngaziqalisa ngomnyaka ka2015 lapho engangicula ngincedisa umculi uSigodo. Kuthe ngo2016 ngabumba elami iqembu engilikhokhelayo lakhathesi.
CL: Ngubani owakuthathekisayo uze uqalise ukucula umaskandi?
FS: Mina ngize ngicule umaskandi ngathathekiswa ngumculi uZinja ziyamluma ngoba ngimbona ecula kamnandi.
Ngemva kwalokho ngabona kungcono ukuthi lami ngicule umaskandi ngoba ngiyamthakazelela.
CL: Lokhe waqala ezokucula sowakhupha amadlalade amangaki mfoka Sibanda?
FS: Njengomculi osasemutsha kwezomculo sengikhuphe idlalade elilodwa elilesihloko esithi, “Kude la Engiyakhona,” elilengoma ezingu-12. Isihloko lesi sichaza ukuthi kwezomculo kangideli ngisaselohambo njalo ngisazoqhubekela phambili ngijabulisa uzulu.
CL: Umphakathi uthanda ukwazi ukuthi uvame ukudlalela ngaphi ingoma zakho jahalakithi?
FS: Ingoma zami ngivame ukuzidlalela kuma-shows atshiyeneyo agoqela eBerea Park, Hilbrow, Soweto kanye lakwezinye indawo ezehlukeneyo. Ngilakho njalo ukumenywa ngabantu emitshadweni kanye lasemadilini okuzalwa.
CL: Abantu bathini ngomculo wakho Vodloza njalo ukhangelele ukubenzelani lonyaka?
FS: Abantu bayawuthakazelela kakhulu umculo wami njalo bangikhuthaza ukuthi ngiqhubekele phambili kwezomculo. Ngalokhu ngizabakhiphela elinye njalo idlalade elitshisayo ngibuye ngibavakatshele endaweni ezehlukeneyo.
Ngikhangelele ukuthi ngoNcwabakazi ngiyevakatshela kwelakithi koBulawayo ngijabulise uzulu ngengoma zami.
CL: Bunzima bani oyake uhlangane labo kwezomculo njalo nkuthazo bani oyipha abaculi abasacathula?
FS: Ubunzima engiyake ngihlangane labo kwezomculo yikuswela imali yokuzithuthukisa lokuthi abanye abantu basuka bangithuke njengoba kungayisibo bonke abangithandayo. Okunye njalo kukhona abantu abangitshontshela umculo wami bawuthengise ngentengo ephansi okudala ukuthi nxa sengiwuthengisa abantu bengawuthengi ngendlela ejabulisayo.
Ngalokhu kubaculi abasasungula ngithi kababekezele bakhangele phambili noma bethukwa kumbe beswela imali yokuzithuthukisa.
