uMthunywa
OMANDULO babengasomi nxa babethi igula elidala livame ukunuka amasi nanku phela kule iviki iphephandaba likazulu lize lazo njalo ezinambithekayo. Kule iviki siliphathele ivithikazi lentombi elitshaya umculo kamaskandi kuxege ibhulugwe endodeni. Kaliculi nje leligcwalaguma ifefe lingumfana.
Kambe kungaba ngubani umculi wodumo lo ngaphandle kukaPosslete Khumalo Ncube odabuka esigodini seMthanyelwane kweleTsholotsho. Qhubeka ufunda ingxoxo enambithekayo phakathi kwevithikazi leli uPosslete Khumalo Ncube (PKN) lentatheli yephephandaba likazulu uCornelius Luphahla (CL).
CL: Akutsho vithikazi mayelana lembali yakho kanye leyomculo wakho?
PKN: Mina ngakhulela esigabeni seMthanyelwana kwathi ngomnyaka ka2010 ngasuka kuleli ngayasebenzela eSouth Africa. Ngomnyaka ka2013 ngaqala ezokucula kodwa engangicula leqembu elidabuka kwaZulu elibizwa ngokuthi Ontangayethu. Ngaqhubekela phambili ngezomculo ngabona kungcono ukuzimela ngedwa okuyikho engasungula khona iqembu lami ngo2015.
Leliqembu ngalibiza ngokuthi Igqishamnkantsha ngoba ngangichaza ukudalwa kwami ukuthi ngiligcwalaguma.
Ngalokhu-ke leligama lichaza isimo sami.
CL: Umphakathi uthanda ukwazi ukuthi lokhe wasungula iqembu lakho sowakhipha amadlalade amangaki?
PKN: Njengomculi osanda ukusungula sengikhiphe idlalade elilodwa elibizwa ngokuthi Mina Nawe.
CL: Njengomculi wandise ukutshayela ngaphi ingoma zakho ntombenhle?
PKN: Ingoma zami ngivame ukuzidlalela kuma-shows, lemikhosini etshiyeneyo egoqela emitshadweni, kumadili okuzalwa kanye lakweminye imikhosi engiyake ngimenywe kuyo.
CL: Kungani wakhetha ukucula umculo kamaskandi njengoba kungavamanga ukuthi uculwe ngabesifazana.
PKN: Okwenza ngakhetha ukucula umaskandi yikuthi ngijonge ukuvuselela ubuzwe bethu njengamaNguni ngoba inengi labantu kalisayazi imvelaphi yabo. Okunye njalo umculo lo ngiyawuthanda ngakho ungacula umculo owuthandayo kuba lula ukuthi wenze kuhle ngoba ulothando lakho.
CL: Sowathola indondo ezingaki ntombenhle lokhe wangena kwezomculo?
PKN: Lokhe ngaqala ukucula sengathola indondo ezintathu. Eyakuqala ngiyithole ekuqaleni kukaMpandula lonyaka eNew Castle KwaZulu Natal. Le yayingeyokuba ngumculi othandwe nguzulu kulabo bonke abaculi abatsha. Kwathi eyesibili ngayithola ekupheleni kukaMpandula eMgungundlovu, eyokuba ngumculi omutsha ocule kuhle ukwedlula bonke abaculi abatsha. Lapha ngathola kanye lenkomo. Eyesithathu ngayithola ngoLwezi ePetermaritzburg ngenxa yengoma yami eyaba mnandi kulezabaculi bonke abatsha lonyaka ethi “Amanz’amnyama”.
CL: Njengomculi wodumo àkutsho ntombi ukuthi abantu bathini ngomculo wakho?
PKN: Abantu bayawuthakazelela kakhulu umculo wami njalo bangikhuthaza ukuthi ngiqhubekele phambili ngibajabulisa ngingadeli.
CL: Ukhangelele ukwenzelani uzulu njengoba ewujabulela kangaka umculo wakho?
PKN: Ngikhangelele ukuqhubekela phambili ngijabulisa uzulu ngezomculo ngibuye njalo ngimkhuphele idlalade elitsha kumnyaka ozayo kanye leDVD ukuze azibonele ukudla kwamehlo angezwa ngelikabathi.
CL: Bunzima bani oyake uhlangane labo njengomculi njalo nkuthazo bani oyipha abaculi abasasungula?
PKN: Ubunzima engiyake ngihlangane labo yikuthi kangilabantu abangincedisayo ngemali ukuze ngithuthukise ngamandla umculo wami. Okunye njalo abantu bayangintshontshela umculo wami bawuthengise ngentengo ephansi okuyikho okungibulalela intuthuko kwezomculo ngoba nxa sengiwuthengisa ngentengo ephezulu abantu basuka bangawuthengi ngendlela ejabulisayo ngoba sebelawo.
Kubaculi abasasungula ngithi kabaqhubekele phambili ngezomculo njalo kabahloniphe uzulu ukuze bathuthuke.
Okunye njalo kabasebeñzise iziphiwo zabo ngendlela ebalulekileyo ukuze bathole usekelo kuzulu.
