uMthunywa
Johas Moyo
ABABONA ngezilimo ze-horticulture esabelweni sakoBulawayo sebecebise abalimi ukuthi bangasebenzisi imithi ikakhulu ebulala izibungu ngoba ilakho ukubulala izilimo njengoba kutshisa kulezinsuku.
Ekhuluma loMthunywa uNkosazana Treggie Mpofu onguHorticulture Specialist uthe isikhathi sokutshisa sibi ezilimweni ngoba izibungu kanye lobudli kuyanda kungakho abalimi bacina besebenzisa imithi etshisa izilimo kukanti bona bayabe behlose ukubulala izibungu.
“Ukutshisa okukhona kulezinsuku kuyesabeka njalo kubi lasezilimweni kungakho abalimi kumele bathathe isikhathi sabo behlola izilimo zabo ukuze zingahlaselwa yizibungu.
“Abalimi bengekela ukwenza lokhu bacina bezifafaza ngemithi loba nini okucina kulimaza izilimo,” kutsho uNkszn Mpofu.
“Njengoba kutshisa sikhuthaza abalimi ukuthi bafafaze izilimo zabo ekuseni kusaqandelela kumbe ntambama ngoba umuthi uyingozi ungahlangana lelanga elitshisayo kanti njalo kuyatshisa izilimo,” kutsho uNkszn Mpofu.
Uqhubekele phambili ekhuthaza abalimi ukuthi babone ukuthi izilimo zabo ziyathelelwa nsukuzonke ngoba kuyaphangisa ukoma ngoba kuyatshisa.
“Abalimi kumele babone ukuthi bayathelela loba kabili ngosuku ukuze bengalahlekelwa yizilimo zabo ngokutsha.
“Umhlabathi kumele uhlale umanzi okuyikho okwenza ukuthi izilimo zikhule kuhle,” kutsho uNkszn Mpofu.
Uphethe ngokukhuthaza abalimi ukuthi babe lendlela abavikela ngayo ilanga ezilimweni okugoqela ukufaka amahlamvu kumbe utshani ngenhloso yokuvikela ukutshisa kwelanga njalo abalimi bakhuthazwa ukuthi bathole ulwazi kubalimisi abaseduze labo ukuze bengasebenzisi imithi ezabulala izilimo zabo.
