uMthunywa
YiNtatheli kaMthunywa
UMSEKELI kaMongameli welizwe uKhomuredi Emmerson Mnangagwa usekhuthaze abalimi ukuba bathathe ukulima njengebhizimusi ukwenzela ukuba kuvuselelwe umnotho welizwe.
UKhmrd Mnangagwa ukhulume lamazwi ngeviki edluleyo ngesikhathi ekhuthaza abalimi abavela ezigabeni ezitshiyeneyo eTrade Fair.
Kubikwa abalimi abanengi balima izilimo ezinlutshwane ezenela izimuli zabo kuphela.
“Ngithanda ukukhuthaza abalimi bonke ukuba baqalise ukulima izilimo zokuthengisa hatshi ezokudla kuphela.
“Sesadlula isikhathi sokuthi abalimi balime izilimo ezilingene imuli zabo. Impilo yalamuhla isiguqukile ngakho umlimi okhaliphileyo ulima izilimo ezinengi adle ezinye besekusithi ezinye azithengise ukuze azuze imali yokuthenga imitshina yokulimisa,” kulandisa uKhmrd Mnangagwa.
UKhmrd Mnangagwa uqhubekele phambili wathi uHulumende uvame ukunikeza abalimi inhlanyelo mahala ngakho kumele bayisebenzise ngendlela eqondileyo.
“Minyaka yonke uHulumende unika abalimi inhlanyelo kunye lomvundiso ukuze benelise ukulima. Abanye abalimi bayathengisa inhlanyelo le okuyinto engalunganga. Umlimi ophiwe inhlanyelo kumele abone ukuba uyalima okuzwayo ukuze aziphilise kunye lemuli yakhe ngemva kwalokhu athengisele abanye.
“Kukanti abalimi abafuye inkomo labo kumele bafuye inkomo ezinengi kodwa bananzelele ukuthi nxa amadlelo esemalutshwane bathengise inkomo esezindala ukuze zingacubi ngesikhathi sendlala,” kuphetha uKhmrd Mnangagwa.
