uMthunywa
Ncekwenhle Ncube
ABALIMI bakhuthazwa ukuthi balime izilimo ezivuthwa masinyane njengoba izulu lingathi lizabuya libe linengi kodwa liphangise ukuvalelisa.
Njengoba isikhathi sokusewula kwezulu sesitshaye sadlula abalimi bayakhuthazwa ukuthi nxa beqala ukuhlanyela bakhethe izilimo eziphangisa ukuvuthwa ngoba kungenzeka izulu liphangise ukuvalelisa izilimo zabo zingakavuthwa.
Lokhu kuza kulandela indlela izilimo zomnyaka ophelileyo ezitshe ngayo zingakavuthwa ezigoqela umumbu ngemva kokuthi izulu selihambile.
Ekhuluma lentatheli kaMthunywa umlimisi uMnumzana Khumbulani Sibanda uthe abalimi kuhle bahlele inhlanyelo zabo kusaselethuba njalo kungaba kuhle ukulima izilimo ezivuthwa masinya.
“Abalimi sibaxwayisa ukuthi balime izilimo ezivuthwa masinya. Lokhu kuzabanceda ukuthi benelise ukuzuza ukudla kokufaka eziphaleni zabo nxa kungenzeka ukuthi izulu line okwesikhathi esifitshane.
“Izilimo ezifana lamabele, inyawuthi, uphoko kanye lendumba ezibizwa ngokuthi ngomaqutha kumbe uqedudubo kuhle abalimi kube yizo abazilimayo,” kugcizelela uMnu Sibanda
Abalimi bakhuthazwa ukuthi badinge inhlanyelo ezifana lalezo ngoba zingathathi ibanga elide lokuthi zivuthwe njalo inhlanyelo le iyenelisa ukuvuthwa noma izulu libe lilutshwana.
Kubikwa izilimo ezithatha isikhathi eside ukuvuthwa zingaba sengozini yokutshiswa lilanga nxa kungenzeka izulu libaleke zingakavuthwa.
Intatheli ixhumane lomunye umlimi osesabelweni seGwanda eManama uMnumzana Thembani Skhosana ochaze ukuthi ukulima izilimo ezivuthwa masinyane kumsizile kakhulu ngomnyaka odlulileyo ngoba wenelisile ukuzuza ukudla okulingene imuli yakhe noma nje izulu labatshiya.
“Saba lenhlanhla ngokulandela izixwayiso zabalimisi ngomnyaka ophelileyo ezokuthi silime amabele. Lokhu kwenza sazuza ukudla kokufaka esiphaleni noma nje izulu laliphangise lahamba latshiya izilimo zethu zingakavuthwa.
“Lonyaka sikhangelele ukuthi silime amabele lendumba njengoba izulu likhanya liphuza ukubuya okungadala ukuthi liphangise lihambe,” kuphetha uMnu Skhosana.
