uMthunywa
Ethel Ncube
INKAMPANI yeKlein Karoo 2 isikhuthaze abalimi ukuba balime imihlobo yenhlanyelo ehambelana lenhlabathi yabo njalo emelane lokutshisa ukuze benelise ukuthola isivuno esihle.
Okhangela ngezenhlanyelo kunkampani le, uNkosazana Nonsikelelo Mpofu uveze ukuba abalimi kumele babe lolwazi ngenhlanyelo ukwenzela ukuba nxa bethenga bangathengi umhlobo wenhlanyelo ongahambelani lendawo abakuyo.
UNkszn Mpofu uthe indawo lendawo ilomhlobo wenhlanyelo etshiyeneyo okumele ihlanyelwe.
“Esabelweni seMidlands abalimi kumele bathenge inhlanyelo okuthiwa yiPGS61 ethatha amalanga angu-131 ukuthi ivunwe. Inhlanyelo le iyamelana lokutshisa njalo nxa isizala izala ngapha langapha. Isitshakala siyavala phezulu ukuba amanzi angangeni phakathi ngoba amanzi angangena phakathi alakho ukubolisa umumbu ungakavuthwa usesemasimini.
“Nxa usuvuna ulakho ukuthola isivuno esingaba phakathi kwamathani ayisificaminwe mibili letshumi kuhekitha,’’ kubika uNkszn Mpofu.
Uqhubekele phambili eveza ukuba isabelo seMatabeleland South laso silomhlobo waso wenhlanyelo okumele uthengwe ngabalimi.
“Umhlobo wenhlanyelo okumele uthenge ngabaseMatabeleland South yiPGS51 le yona ithatha inyanga ezintathu ukuthi ivuthwe njalo layo izala ngapha langapha. Isivuno umlimi angasithola siphakathi kwe 7 kusiya ku-10 tonnes kuhekitha. Inhlanyelo le ayiphehlwa emasimini ize iyevunwa ifakwe esiphaleni kungakho sikhuthaza abalimi ukuba babelolwazi ngenhlanyelo abazithengayo,” kuveza uMnu Mpofu.
Ubuye waveza ukuba lalabo abalima bethelezela labo kumele bazi inhlanyelo abayilimayo.
“Abalima bethelezela kumele bahlanyele iPGS65 yona layo ezala iziqu ezimbili njalo ilakho ukubanika isivuno esiphakathi kwe-11 kusiya ku-14 tonnes kuhekitha eyodwa. Inhlanyelo le ingavunwa ilakho ukusetshenziswa ukwenza ukudla kwezifuyo. Inhlanyelo le ayiphehlwa layo ize iyefakwa emasimini.
Uphethe ngokuxwayisa abalimi ukuthi nxa bethenga inhlanyelo bangabi lenhloni zokubuza ukuthi yiphi inhlanyelo ehambelana lendawo abavela kuyo,” kuphetha uNkszn Mpofu.
