uMthunywa
Ethel Ncube
ABABONA ngezokulima elizweni abe-Agritex bakhuthaza labo abakubhizimusi lezokulima ukuthi bazame ukulima idelele ngoba liyisilimo esithandwa ngabanengi njalo esingabapha inzuzo enhle.
UMnumzana Philisani Dube ongumlimisi eLupane ngaphansi kwe-Agritex uveze ukuthi abalimi abalesifiso sokulima idelele bangaqalisa ukulilima khathesi.
UMnu Dube uthe ukulima idelele lentanga akuhluphi ngitsho.
“Ugebha amagodi alingeneyo nje ubusuphosela intanga zedelele kuthi nxa usugqibela ufaka inhlabathi angathi uyayihaza nje mbijana ukuthi ivale ihlanyelo.“Kuthi nxa usulithelela lakho kumele amanzi abe ngalingeneyo angakhukhuli inhlanyelo yakho.
Inhlanyelo le ithatha amaviki amathathu kusiya kwamane ukuze imile phansi. Kukanti-ke nxa ufuna intanga zakho zimile masinya uyalala uzifake emanzini akhudumalyo kodwa engatshisi ubusuku bonke, lokhu kwenza zimile masinyane,” kubika uMnu Dube.
Uqhubekele phambili eveza ukuba isilimo lesi asithathi isikhathi eside ukuvunwa.
“Idelele nxa lithola kuhle amanzi liyazikhulela kuhle nje kungelahlupho.
Nxa ulivuna uyakhangela nxa selizele njalo uqala ukukha abantwana laba sebelamalanga amabili. Futhi kumele usebenzise ingqamu ukulikha ukuze lisale lizala,” nguDube lowo.
Uphethe ngokuthi umkambo wedelele uhlala ukhona malanga onke kungakho abalimi bangazitshayela imali ngokulima idelele lentanga.
