uMthunywa
Ethel Ncube
ABABONA ngeze-horticulture kunhlanganiso yeAgritex sebekhuthaze uzulu ukuthi alime amakhowa ukuze alwisane lendlala njengoba engaphuzi ukuvuthwa njalo elinywa laloba yisiphi isikhathi.
UNkosazana Treggy Mpofu oyingcitshi kweze-horticulture uveze ukuthi amakhowa awalandleko ezinengi kodwa afuna umuntu abelolwazi olugcweleyo.
“Isilimo lesi sifuna umlimi adinge kwabeAgritex ukulinywa kwaso nxa engazwisisi ukuze athole isivuno esihle,” kubika uNkszn Mpofu.
Ekhuluma lentatheli uNkszn Mpofu uveze ukuthi kulendlela elandelwayo nxa umlimi elima amakhowa.
“Kulomhlobo wamakhowa okuthiwa yi-oyster athatha amaviki amane ukuvuthwa. Umlimi kumele nxa ewalima abone ukuthi uyadinga amahlanga omumbu, awengqoloyi, amakhasi amabhanana kumbe utshani bokufulela.
“Ngemva kwalokho abesethenga njalo amaphepha amhlophe okuthiwa ngama-polythene bag ukuze akhe indlu egcina ubumanzi njalo ehlala iqandelela iku 14-28 degrees celsius,” kutsho uNkszn Mpofu.
Uqhubekele phambili eveza okwenziwayo kulungiselelwa ukulinywa kwamakhowa.
“Umlimi uthatha amahlanga la awakhethileyo awaqumaqume abemancane awafake etankeni ye-plastic engaba ngamalitha angu-200 okwamahola angu-24 ukuze angabi lerusi.
“Ngemva kwalokho ayakhutshwa afakwe etankeni egezisiweyo ngesepa kumbe ijikhi (Jik) abiliswe akwamahola amabili. Kungedlula lokhu ayasuswa njalo afakwe kuma-polythene bag amhlophe ahanjiswe endlini lapho okuzahlanyelwa khona,” kutsho uNkszn Mpofu.
Ubuye waveza ukuthi indlu lapho okuzahlanyelelwa khona kumele ibe ihlanzekile.
“Kumele lapho okuhlanyelwa khona amakhowa kube yindawo ehlanzekileyo njalo kufakwe itshebetshebe phansi ngoba yenza indlu le ihlale iqandelela. Umlimi sezathatha amasaka la awahambise endlini awafake phezu kwezitina athathe inhlanyelo yamakhowa engaba yi-250 kusiya 500 grammes ayihaze phezu kwamahlanga kusiya emaceleni laphakathi aphinde afake amanye futhi ahaze inhlanyelo avale njalo abuye afake enye inhlanyelo afake futhi amahlanga,” kutsho uNkszn Mpofu.
UNkszn Mpofu uphinde wagcizelela ngokuthi indlu lapho okulinywe khona amakhowa kumele ihlale imnyama.
“Kumele kuvalwe amafasitela ngamaphepha amnyama lapho okuhlanyelwe khona okwamalanga angu-14 kusiya ku-21 ngoba enza kuhle nxa kungelakukhanya ngamalanga lawo, kusuka lapho sezakhutshwa kube lokukhanya okwamalanga angu-21 kusiya ku-28. Ngemva kwalokhu ayabe selungele ukuvunwa,” kutsho uNkszn Mpofu.
Uphethe ngokukhuthaza abafisa ukuwalima ukuthi bavakatshele emahofisini abo ukuze bachazelwe kabanzi ngesilimo lesi.
