uMthunywa
Thokozile Mbedzi
INHLANGANISO yeAgritex isikhuthaze abalimi ukuba balime amakhowa ngoba alenzuzo njalo alamaphulotheni amanengi kakhulu afunakala emzimbeni yabantu.
Intatheli kaMthunywa ikhulumisane lengcitshi kweze-horticulture uNkosazana uTreggy Mpofu esenkundleni yeZimbabwe International Trade Fair othe amakhowa aqakathekile kakhulu ngoba alenzuzo kubalimi njalo ayavikela abantu emikhuhlaneni.
“Amakhowa alenzuzo kakhulu ngakho abalimi sibakhuthaza ukuba bawalime ngobunengi bawo ngoba alenzuzo njalo ayancedisa emzimbeni. Okuhle ngokulima amakhowa yikuthi umlimi engawahlanyela uyalinda nje inyanga ezintathu ngemva kwalokho uyabe esevuna nje kuphela umnyaka uze uyephela.
“Umlimi esakeni ulakho ukuzuza i-RTGS$4 000, lokhu kuveza inzuzo enkulu,” kuchaza uNkszn Mpofu.
“Ngenxa yokuthi amakhowa alakho ukuvikela abantu emikhuhlaneni, angokunye kokudla okumele bakudle.
Uqhubekele phambili njalo uNkszn Mpofu esithi nxa upheka amakhowa akukho okulahlwayo. Nxa umlimi eseqeda ukuwavuna ulakho ukuthola njalo ukudla kwemvundla ama-pellets.
“Amakhowa alenzuzo ngoba akula okulahlwayo nxa umlimi esecina ukuwavuna ulakho ukwenza ukudla kwemvundla. Lokhu kudla kulemali ngakho umlimi ulenzuzo ephindiweyo nxa engalima amakhowa.
“Kungakho abalimi kundawana zonke abafisa ukulima amakhowa kabasondele kwabe-Agritex ukuze baxoxisane labo ngakho konke abafisa ukuba bakuzwisise ngokulima amakhowa,” kuphetha uNkszn Mpofu.
