uMthunywa
Thokozile Mbedzi
INHLANGANISO yeAgritex ikhuthaza abalimi ikakhulu abakuRegion 5 ukuba balime amabele ngoba ehambelana lezulu elitholakala endaweni le.
Ekhuluma lentatheli kaMthunywa uAgritex officer uMnumzana uGidion Nzombe uthe abalimi kuRegion 5 (Matabeleland South kanye leNorth) kabalime amabele ngoba bengazitshayela inala lanxa izulu lingaze libe lilutshwana.
“Abalimi kuRegion 5 kumele balime amabele ngoba umkhathi esikhangelane lawo ulelanga njalo lezulu kwezinye indawo alikani kuhle ngakho akumelanga balime inhlanyelo ezifuna izulu elinengi kakhulu ngoba bangalahlekelwa yinhlanyelo kunye lezilimo zabo.
“Umkhathi esikhangelane lawo awumanga kuhle ikakhulu kubalimi abakuRegion 5 ngitsho lakancane ngakho kumele basebenzelane kakhulu labalimisi babo yikho sibakhuthaza ukuba balime amabele ngoba emelana lomkhathi wokutshisa.
“Sibakhuthaza ngenjongo yokuba labo bathole isivuno ngoba abanye langomnyaka ophelileyo kabazange bazuze lutho emasimini abo,” kuchasisa uMnu Nzombe.
Uqhubekele phambili njalo esithi labo abafisa ukuba labo balime umumbu kumele balime indima ezimbalwa njalo inhlanyelo eziphangisa ukuvuthwa.
“Abalimi abafisa ukulima umumbu kumele balime inhlanyelo eziphangisa ukuvuthwa enjengefanekiswe inkawu, iZap 33, 44, lezinye. Lokhu sikucebisa abalimi ngoba sisenzela ukuba bahambelane lomkhathi labo bathole inzuzo kuzilimo zabo.
Uqhubekele phambili ngokuxwayisa abalimi ukuthi kumele njalo bananzelele izilimo zabo ngoba nxa ilanga litshisa kakhulu imikhuhlane iyanda.
“Nxa kungaba lelanga imikhuhlane kayilutho kuzilimo kungakho kuyabe kudingeka ukuba abalimi bahlale behlola izilimo zabo ukuze baphangise ukunanzelela imikhuhlane yelatshwe masinya ingakamemetheki.
“Sikhuthaza njalo abalimi ukuthi babikele abalimisi babo ngokuphangisa ukuze babaphathise bangacini belahlekelwa yisivuno sabo,” kuphetha uMnu Nzombe.
