uMthunywa
Ethel Ncube
IQEMBU leZimnyama eliphuma ePlumtree lizadibana labanye abaculi abatshiyeneyo eBulawayo Theatre ngoMgqibelo kuyonale iviki lapho elizabe lijabulisa abalandeli balo.
UAphiwe loSobancane ngabahlabeleli be-maskandi njalo sebenelise ukuhamba endaweni ezinengi becula ingoma zabo ikanti ngempelaviki bazabe belapha koNtuthu bedibene lamaqembu athi Sekunjalo MaAfrika, Simunye Simunye kunye loCalvin Mangena.
Aphiwe and Sobancane
UMthunywa uxhumane loHandsome Sibanda onguye okhangele iqembu leli oveze ukuba uBulawayo uzavungama wonke kumcimbi wangempelaviki.
“UAphiwe loSobancane lokhe baqala ukuhlabela sebakhipha idlalade elilodwa elilengoma eziyisikhombisa. Kuliviki bazabe benandisa koBulawayo ngempelaviki lapho kuzabe kulabanye abahlabeleli abathi uCalvin Mangena, iqembu leSimunye Simunye, leqembu leSekunjalo MaAfrika. Sithembisa abalandeli bethu uluju lodwa njalo sibakhuthaza ukuthi babuye ngobunengi babo,” kulandisa uSibanda.
Uqhubekele phambili eveza ukuba abantu kababuye ngobunengi bezosekela abahlabeleli.
“Ngicela abantu bakoBulawayo babuye bazosekela abantu bakibo ngoba yiyo kuphela indlela abahlabeleli bakithi abangakhula ngayo.
“Amalungiselelo onke asephelile, sibaphathele uluju lodwa, kababuye bezozizwela ingoma ezimnandi esibaphathele zona,” kuphetha uSibanda.
