uMthunywa
Ethel Ncube
ZILOKHU zithithibele izakhamizi zeMberengwa ngaphansi kwenduna uBvute ngemva kokuba kutholakale isidumbu emfuleni silamanxeba umzimba wonke.
Indaba le yenzakale ngeviki ephelileyo lapho okutholakale umzimba kaWilson Chuma oleminyaka engu-27, umanxebanxeba emfuleni uDove.
Kuvele ukuba umuyi wasuka esiyadinga igolide eceleni komfula ehamba labanye obaba ababili.
Ekudingeni kwabo igolide kwathutsha amadoda amabili ayehlomile ngamabhemba afika abuza umuyi labanye bakhe ukuba badingani emfuleni lo. Kubikwa abanye bananzelela masinyane ukuba kungabe kukhona ingozi engenzakala bahle bacela ezinyaweni.
Ngokungesabi, uChuma wasala, okwabayikhona ahlaselwa ngamabhemba umzimba wonke, qede lapho bamjikela emanzini.
Kubuye kwavela, kumbiko wamapholisa esabelweni seMidlands ukuba abangane bakaChuma baphenduka bathola umzimba wakhe usundenda emanzini.
Umzimba kamuyi wahanjiswa esibhedlela seZvishavane ukuba uyehlolwa isizatho sokufa.
Ekhuluma loMthunywa isikhulumi samapholisa eMidlands uInspector Emanuel Mahoko uveze ukuba udaba olunjalo balalo.
“Udaba olunjalo silalo sicela ukuba ongabe elolwazi lokuthi kwahambanjani abikele amapholisa aseduzane laye ukuze kubotshwe abenza lokhu,” kutsho uInsp Mahoko.
