uMthunywa
YiNtatheli kaMthunywa
IZAKHAMIZI zeLuveve, eMakhandeni leGwabalanda koBulawayo zikhala ezimathonsi ngenye ibhawa esiphenduke iSodoma leGomora elokitshini leOld Luveve nanko phela kubikwa abantwana abangaphansi kweminyaka engu-18 sebephenduke amabele endlela abonakala kule indawo engamagadanqunu, uMthunywa uyakuveza lokhu lamhlanje.
Kubikwa ilanga lingavele lingene kunina kuba yisiphithiphithi endaweni le intsha isehla isenyuka indawana yonke igqoke izigcebhezana, abanye bebhema, benatha utshwala njalo abanye bethandelwe ngamaxhegu.
UMthunywa uyakubika ngokugcweleyo ukuthi kulabafundi abane beLuveve High School abamiswe (suspended) esikolo kuviki ephelileyo ngemva kokubonakala bebuka imifanekiso ye-pornography njalo belingisela indlela yokuhlubula impahla besesambuzi sesikolo.
Izakhamizi zakule indawo ezikhulume lentatheli kaMthunywa ziveze ubumunyu bazo ngokuganga kanye lokuxhwala osekusenziwa ngabantwana kule indawo ngenxa yendawo le.
Esinye isakhamuzi esikhulume loMthunywa ngale indaba uMnumzana Trust Siziba uthe indawo le isilesikhathi ivuliwe kodwa umonakalo osukhona mkhulu.
“Ibhawa le isisixhwalisele abantwabethu, ntambama kunyakazela okunzima lapha, intsha yonale eleminyaka engu-14 kusiya phezulu iyabe isehla isenyuka khonapha ngapha lokuyabe kugqokiwe kunzima ikakhulu ngehola lesificaminwe mibili ntambama.
“Okusenza sithukuthele kakhulu yikthi abancinyane laba bayabona okwenzakalayo bazakubona njengomzekeliso omuhle kanti ngitsho,” kulandisa uMnu Siziba.
UMnumzana Polite Dube laye ugcizelele ngobubi bokukokotsha kwentsha okwenzakala kule indawo ethi kufiphaza ikusasa yabo enhle.
“Sesike sayabikela ukhansila ngokuganga kwabantwana okwenzakala kule indawo ikakhulu ntambama ngoba abantwana bayanatha utshwala babheme lokuzitshaphaza nje labo-sugar daddy,” kutsho uMnu Dube.
Esinye njalo isakhamuzi esitholakala eduze lendaweni le uSihle Mlotshwa uveze ukuthi okubi yikuthi abantwana abancane bayavunyelwa ukungena endaweni le.
“Lokhe ngingelankani ngokwenzakalayo lapha, kudala sasikuzwa kuzindaba kusenzakala khatshana khathesi sikukhangele, uthola ixhegu likokotele umntwana olingana lomzukulu walo, asisakwazi ukuthi abadala labo bayawubona yini umonakalo abawenzayo bezikhohlisa labantwana,” kutsho uNkszn Mlotshwa.
Intatheli kaMthunywa ivakatshele kule indawo ngoLwesihlanu kuviki ephelileyo yazibonela izigigaba ezenzakala phakathi kwebhawa le.
UMthunywa ubone abantwana abancinyane behlubula impahla belingisa okwenziwa ngoBev loZoey.
UMthunywa uphinde waxhumana lomnikazi wendawo le (ibizo siligodlile) wala wemba phansi ukuthi kulabantwana abangaphansi kweminyaka engu-18 abaganga endaweni yakhe.
“Ibhawa lami ilabonogada ab alindayo emnyango akulamntwana ongenayo njalo inkamba yamapholisa iseduzane lebhawa yami futhi abanye baba banatha kiyo,” kutsho umninibhawa.
Isimanga kodwa yikuthi intatheli ithe ingena kule indawo onogada labo bebengekho ukuthi bahlole iminyaka yokuzalwa yabantu abangenayo.
Intatheli ikhulume njalo loKhansila kaWadi 15 uTamani Moyo oveze ukuthi usamukele imbiko evela kuzakhamizi zisola okwenzakala kule indawo.
“Abantu bayakusola sibili okwenzakalayo kodwa-ke mina sengike ngabotshiswa ngumninindawo le esola ukuthi kungani ngimkhuza kukanti abantu yibo abayabe besola,” kutsho uKhansila uMoyo.
UMthunywa wenelise njalo ukuxhumana loMqondisi wezemfundo koBulawayo uMnumzana Dan Moyo othe ebuzwa ngokumiswa kwabafundi besikolo seLuveve abatholakala bebukele i-pornography kanye lokulingisela abahlubula impahla wathi indaba le kayikafiki ehofisini yakhe.
“Mina bengingakakuzwa lokho kubanjwa kwalabo bantwana bebukela abantu abanqunu kanye lokuthi bamiswe izifundo,” kutsho uMnu Moyo.
