uMthunywa
Joel Ndlovu
ABALIMAYO sebekhuthazwe ukuba balime imiqwente ngoba ilula ukulima njalo lokuyinakekela kayihluphi ngitsho okwenza ingabi lomsebenzi omnengi.
Ekhuluma lentatheli kaMthunywa uNkosikazi Agnes Ndebele oyincitshi kwezokulima esabelweni seMatabeleland North uthe imiqwente ilula ukulima njalo yisilimo esingahluphiyo ukunakekela.
“Imiqwente ilula ukulima njalo ayisebenzisi kakhulu. Umlimi kumele agebhe amagodi atshona okulingeneyo njalo kumele amagodi lawo ehlukane ngamamitha amahlanu ukwenzela ukuthi njengoba imiqwente iyisilimo esilempande ezinde sithole indawo yokunabela ingaminyani okuzenza ikhule kuhle.
“Umlimi angalima imiqwente yakhe akumelanga ayithelele kakhulu kusase zintanga ngoba intanga lezo zingahlala zimanzi ziyakhunta zivumele imikhuhlane ukuthi ingene icine isifa, ngakho-ke kumele abone umlimi ukuthi uthelela ngonanzelelo,” kutsho uNkkz Ndebele.
Lapho okuzahlanyelwa khona imiqwente kumele kube ngumhlabathi owakhekileyo njalo ongela zibungu ezizakudla zibulale isilimo.
“Njengoba lesi kuyisilimo esilempande ezinde kumele umlimi ahlanyele lapho okulenhlabathi eyakheke khona njalo kumele akuqakathekise ukuthi utshintshanisa kuhle izilimo zakhe, ezilempande ezinde lezilempande ezimfitshane ukuze umhlabathi wakhe ungalahlekelwa yisimo sawo.
“Umhlabathi owakhekileyo uyavumela ukuthi ukudla okusemoyeni kungene enhlabathini okwenza ukuthi nxa imiqwente isihlanyelwa ithole sekuvele kulokudla, lokhu okwenza ikhule kuhle,” kutsho uNkkz Ndebele.
Uthe njengoba imiqwente kuyisilimo esikhula siphakathi kwenhlabathi sisengozini yokudliwa yizibungu ngenxa yesizatho lesi kuqakathekile ukuthi umlimi ahlale ephendula umhlabathi wakhe ukwenzela ukubulala izibungu njalo kumele ahlale efafaza imithi ebulala lezo zibungu.
Uphethe ngokuthi imiqwente iyahlaselwa yimikhuhlane lezinanakazana ezinengi ngakho-ke abalimi ekulweni lezinanakazana lezi kumele batshintshanise imithi abayisebenzisayo.
“Izinanakazana ezihlasela izilimo ziyajayela umuthi zicine zingasafi kungakho-ke kuqakathekile ukuthi umlimi atshintshanise imithi yakhe ngokuya kwesikhathi ukuze kubelula ukulwa lalezo zinanakazana lokuqeda imikhuhlane.”
