Kulenzuzo ukulima ihanyanisi

13 Feb, 2020 - 00:02 0 Views
Kulenzuzo ukulima ihanyanisi

uMthunywa

Joel Ndlovu

ABALIMI sebekhuthazwe ukuba balime ihanyanisi ngoba ilenzuzo kumlimi kanye lakwezinye izilimo nanko phela iyabulala izibungwana ngenxa yomnuko wayo.

Ekhuluma lentatheli kaMthunywa uMnumzana  Never Verengera oyi-agronomist kunkampani yeFarm and City Centre uthe ihanyanisi yisilimo esiqakathekileyo njalo esilenzuzo enhle ngoba iyaxotsha izibungu ngomnuko wayo ivikele lezilimo eziseceleni kwayo ukuthi zingadliwa.

“Ihanyanisi iqakatheke kakhulu ngoba iyavikela izilimo ezinjengemibhida ukuthi zingadliwa yizibungu, ikakhulu i-garlic lama shallots.

“Abalimi kumele bahlanyele ihanyanisi eceleni kwezilimo ngaso sonke isikhathi ukuze bangahlutshwa yizibungwana ezihlupha ezivandeni lemasimini,” kulandisa uMnu Verengera.

Ihanyanisi iyasiza njalo kusimo somhlabathi, nanko phela iyabambanisa umhlabathi okuyikho okwenza izilimo ezinjengemiqwente elempande ezinde zimile kuhle.

“Ihanyanisi ilempande ezinengi eziyizo ezenza inhlabathi ibambane njalo nxa sokulinywa ezinye izilimo zithola umhlabathi usubuthakathaka okwenza zimile kuhle,” kutsho uMnu Verengera.

UMnu Verengera ugcizelele ngokuthi ihanyanisi yisilimo esingaphila loba kungelamanzi njalo silula ukuhlanyela  lokunakekela. 

UMnu Verengera uphethe ngokuthi ebantwini ihanyanisi iyaphathisa ekugayweni kokudla ngoba ile-fibre edingakalayo emathunjini. Lokhu kuyanceda ngoba kukhweza isilinganiso samagcikwane adingakalayo (friendly bacteria) emathunjini omuntu kuthuthukise ukusebenza komzimba.

Share This:

Sponsored Links