uMthunywa
YiNtatheli kaMthunywa
KUCHITHEKE amabhodo, abantu bagcwala yonke indawo, kweqiwa intango amalunga emuli yakoNyoni yesiqintini seMangaba esigabeni seMberengwa evela emangcwabeni sekukhonjwana ngobuthakathi.
Indaba le esabhayisikopo yenzakale ngempelaviki edluleyo lapho okuvele ukuba amalunga emuli yakoNyoni athi evela emangcwabeni lapho obekukhalwa khona kwaphenduka isitiki sezibhakela sekulwiwa kubangwa ukuthi lo owedlule emhlabeni ubulewe ngubani.
Esinye isakhamuzi esingumakhelwane ebesisesililweni lesi kodwa esingathandanga ukuqanjwa ngebizo sibikele uMthunywa ukuthi okwenzakale koNyoni kusendebeni zabantu bonke esigabeni.
“Sathi sivela emangcwabeni kwaqala ukutshintshwana amagama angamahle kusolwa elinye ilunga lemuli ngokufa lokhu.
“Baqala ukuxabana abantu bama amadlodlongwane bagcwala iguma amabhodo okwakuphekelwe kuwo ukudla akhahlelwa abantu basuka sebebaleka ngoba kwasokujikijelwana langezitina.
“Amabhodo esitshebo achitheka abantu basuka bengadlanga sokuncane indawo ngoba izitina zivelela ngapha langapha,” kulandisa isakhamuzi lesi.
Uqhubekele phambili esithi abemuli le kabazange babe lenhloni lamehlo abantu.
“Abemuli le kabazange babizane bahlale phansi njengemuli kodwa bahle baqala ukwembulana phambi kwabantu ababeze esililweni bethi kulomuntu oloyayo emulini kodwa kabazange baqambe ukuthi ngubani.
“Sakhala isibhakela kwasweleka loyedwa ongalamula futhi akuzange kube loxolisayo,” kuchaza isakhamuzi lesi.
UMthunywa uphinde wakhuluma lelinye ilunga lemuli le elingathandanga ukuqanjwa ngebizo elivumileyo ukuthi kwaba lokungazwanani besanda kuvela emangcwabeni.
“Sathi sivela emangcwabeni kwaba lokungazwisisani kukhonjwana ngobuthakathi kodwa ngeke ngikhulume okunengi ngakho,” kuchaza ilunga lemuli leli.
UMthunywa uxhumane lenduna uBankwe othe indaba le kayikafiki endlebeni zakhe.
