uMthunywa
Ethel Ncube
SEZIDLELA egilweni izakhamizi zeMbembesi ngemva kokuba intsha yakuleyondawo isivuke eseganga ngokuhamba itshaya njalo ihlahlela abantu ngamahloka bengelacala.
Impi le esilamaviki ambalwa iqalile kule indawo itshiye abafana ababili besesimeni esibi nanko phela omunye ulalisiwe esibhedlela sakoBulawayo ngemva kokutshaywa ngenduku lamahloka ekhanda lelihlweni.
Esinye isakhamuzi esikhulume lentatheli uMnumzana James Ndlovu uveze ukuba bakhathazekile ngokuziphatha kwentsha.
“Ukulinyazwa kwabantu osekukhona sokukubi kakhulu kwenza wonke umuntu ahlalele evalweni.
“Omunye ujaha waganyulwa evela nqanda inkomo esiyazivalela. Wahlangana lequla labafana abangafika itshumi lantathu bamthelela bamtshaya abanye bemhlahlela ngamahloka bamtshiya ebangwa lezibi,” kuveza uMnu Ndlovu
Uqhubekele phambili echaza ukuba iqembu labatsha laba selibathwalise nzima abasela kuthula esigabeni.
“Sesihlalele evalweni njengenyoni ngenxa yabafana laba. Lezinsuku ilanga kumele lithi lingena kunina usuvele ususemzini wakho ngoba lingakutshonela ungekho uhle ubekwazi ukuthi usungumphako wabo abafana abakuthatheli lutho bayakuhlahlela nje bakutshiye uthe daca bazihambele.
“Angazi ukuthi sesizahlala njani ngabafana laba lokuthi bengaqondiswa njani asisakwazi kumbe balemithi yokuthi bengagwetshwa asazi,” kubika uMnu Ndlovu.
Iphephandaba likazulu lixhumane lomunye umzali olomntwana owaganyulwa ngehloka uMnumzana Bonginkosi Dywili ovumileyo ukuba umntanakhe wahlahlelwa ngehloka.
“Ngizwa ubuhlungu ngodaba lolu umntanami wayevela nqanda inkomo ezozivalela ilanga lisanda kutshona bahle bamgombolozela bamgamula ngehloka ekhanda lasemzimbeni bamtshiya esesimeni esibi kodwa okwakhathesi usengcono kodwa emzimbeni kakhangeleki.
“Amapholisa azama konke okusemandleni abo ababopha kodwa emthethwandaba batholakala bengelacala,” kubika uMnu Dywili.
Intatheli ibuye yaxhumana lomunye umzali olomntwana owaphatheka ekutshayeni abanye kodwa iqula lakhe laphinda lamhlamukela lamhlasela uMnumzana Thembi Dwyili oveze ukuba umntanakhe usesimeni esibi.
“Umntanami bamhlasela ebusuku evela ezitolo ngenduku elihlweni. Walimala lasemzimbeni wonke nje, khathesi ulalisiwe esibhedlela sakoBulawayo,” kuchaza uMnu Dwyili.
Induna uDumisani Ndondo uveze ukuba udaba lokutshayana lodlame lwentsha lufikile kuye.
“Mina ingozi engiyaziyo ngeyomfana oyedwa osesibhedlela ngoba bangifonela ebusuku bengitshela ngayo ngadinga imota ukuthi athwalwe ebusuku ayethola usizo. Lo omunye okuthiwa waganyulwa laye owesibili udaba lwakhona alukafiki kimi yikuthi sihlutshwa ngamagetsi kwesinye isikhathi abantu bayazama ukungifonela bathole ucingo lwami lungelamlilo.
“Ngisachwayisisa ngodaba lodlame lolu ngoba kusenzakala konke lokhu ngangingekho ngingaqeda ukuchwayisisa sengibona ke amanyathelo engingawenza,” kuphetha induna uNdondo
