uMthunywa
EMAVIKINI ambalwa adluleyo ngike ngavakatshela elizweni laseNingizimu Africa ngisiya landa omunye umngane wami omkhulu owedlula emhlabeni khonale.
Ngadibana lobunzima engithemba inengi labantu selake lahlangana labo, wayethethe unkosikazi wesiSuthwini (umpeli). Ekhonale wayesetshintshe ibizo esesaziwa ngokuthi nguJabulani Ntshangase kodwa eqinisweni enguDingindawo Kheswa.
Iqiniso lokuthi uzalwa kweleZimbabwe sibi sikankosikazi wakhe laye wayengakwazi. Wayezitshela ukuthi yinzalo yaseGoli.
Ngathi ngifika ngimtshengisa incwadi zakhe zokuzalwa lesithupha sakhe wakhala ezimathonsi ethi kambe wayengahlala lomuntu amzalele aze aqede ithumbu engazi ukuthi kibo kungaphi. Uthi wayethi embuza athi wafelwa ngabazali emncane akula sihlobo asaziyo.
Ngathi ngichazela umdeni wakonkosikazi wakhe ukuthi ngithunywe ngabazali bomkhwenyana wabo ukuthi ngizothatha umzimba womntanabo uzongcwatshwa lapho okulele khona okhokho bakhe, baqala besamangala becabanga ukuthi mhlawumbe ngumuntu ofuna ukuhuquluza inotho yomufi bacina bebona ukuthi langempela ngiqinisile, sengibatshengisa lezinye izithombe ayezithethe lomdeni wakhe.
Kuthiwa wayethi nxa esiza ekhaya esuka eGoli athi uya eVenda, eThohoyandou ukuyadinga umkhondo wezihlobo zakhe. Bacina bevuma salungiselela lomdeni wekhosikazi lakhe wazongcwatshelwa ekhaya.
Ekuhambeni lapho silungiselela ukuthwala isidumbu ngangihlangana labanye abafana basekhaya kodwa bezifihla ngoba bengafuni ukuthi kwazakale ukuthi bavela kwelakithi.
Nxa sizifihla kungaba kuyikuthi sizama impilo kodwa unkosikazi wakho kubalulekile ukuthi umtshele iqiniso ngemvelaphi yakho ukwenzela ukuthi loba usuthe wadlula emhlabeni abaphilayo bangathwali nzima.
Banengi abafowethu asebatshona eGoli belemizi amakhosikazi abo athatha konke ngoba besazi ukuthi umuntu lo lizizimbane alila abakibo, kanti-ke ngapha ekhaya siyabe silindele ukuzongcwaba isihlobo sethu.
Labantwana kusuka kubahlukuluze emoyeni njengalabo abomngane wami baqala ukubona ukhulu logogo wabo ozala uyise sebezinkalatha zamajaha lentombi kwabamangalisa ukuthi uyise wayebafihlelani nanko lomuzi ekhaya kwakulenkomo lembuzi kudlana uboya.
Ayixabene.
