uMthunywa
Cornelius Luphahla
LOKHE zididekile izakhamizi zesigabeni seSogodo eBinga ngemva kokuxabana kwezelamani zibanga umuzi kayise okucine kubangela ukuthi omunye wabo afelwe ngumntwana (7) ngendlela engazwisisekiyo.
Impicabadala le yenzakale kunyanga ephelileyo ngaphansi kukasobhuku uSusa Nyoni lapho uMnumzana Learnmore Sibanda axabane lomnawakhe uDouglas Sibanda bebanga indawo yokuhlala baze bayathonisiswa komlisa.
UMthunywa uxhumane loMnumzana Benard Dube omunye wezakhamizi zakule indawo waveza ukuthi ulokudana okukhulu ukuthi kungani uLearnmore waxabana lomnawakhe okwaze kwabangela ukufa komntwana.
“ULearnmore wayengafuni ukuthi umnawakhe akhe lapha wamthathela amasimu waze wayathonisiswa komlisa eChipale. Kuthe mhla bevela thonisiswa sezwa sokuthiwa umntakaDouglas sebhubhile,” kuveza uMnu Dube.
Uqhubeke njalo wachaza ukuthi lokhu kwabamangalisa kakhulu ngoba umntwana lo wayengaguli.
“Lokhu kwaba yisimanga esigabeni njalo kuyasolisa ngoba umntwana lo wayengaguli kodwa wathi ebona uyise efika evela edale umntwana wawa kwahle kwaba yikufa kwakhe,” kutsho uMnu Dube.
Intatheli yenelise njalo ukukhulumisana loDouglas Sibanda oveze ukuthi kalamathe ngalesisenzo yikho nje waze wathutha.
“Lokhu ngizibuza ukuthi kuyini okwabulala umntanami ngoba ngathi ngivela ekuthoniseni lomnewethu umntwana wawa wahle wafa. Ngikhuluma nje ngahle ngathutha ngayahlala ePashu kodwa isimanga yikuthi umnewethu lokhu engilandela ethi kangibuyela eLupane emanxiweni, angazi ukuthi sefunani,” kuchaza uMnu Sibanda.
UMthunywa wenelise njalo ukukhulumisana loLearnmore Sibanda wachaza ukuthi lokhu bexabana lomfowabo.
“Umfowethu wangiphambanisa kakhulu ngokuhlala endaweni yami esazi ukuthi ngimdala kuye, kufanele atshiyele mina ayehlala khatshana njengoba ubaba wayesebhubhile.
“Isimanga yikuthi abantu bathi umntanakhe wabulawa yimi. Angilandaba labo ngoba ngiyakwazi ukuthi ayisimi engambulalayo,” kuphetha uMnu Sibanda.
