uMthunywa
Yintatheli kaMthunywa
AMAQEMBU amabili alodumo kweleZimbabwe iHighlanders le Dynamos azadibana kumdlalo wokuthakazelela ilanga likazibuse enkundleni azaziswa ngokuya kwamalanga.
Lokhu kubikwe nguMphathintambo wogatsha olubona ngezokukhitshwa kwemibiko uMonica Mutsvangwa ngoLweesibili.
“Amaqembu alodumo iDynamos le Highlanders azadibana kumdlalo kaMongameli welanga lokuthakazelela ilanga likazibuse.
Lowo mdlalo uzadlalwa ngaphansi kwezinqumo zenhlanganiso yamazwe ebona ngezempilakahle eyeWorld Health Organisation (WHO) lezelizwe ezokwenqabela ukumemetheka kwegciwane le Covid-19,” kutsho uMpathintambo uMutsvangwa.
Ngomnyaka ka2019 iBosso yanqoba iDembare 2- 0 ukuze ithole isicoco saphezulu.
Kukanti ke ngomnyaka ka2017 abafana beDynamos baba zintshantshu andubana belaxaze iBosso phansi nge 1-0
IDynamos yiyo eyaba liqembu lakuqala ukuthola isicoco esikhulu se Independence Cup ngomnyaka 1982 ngemva kokunqoba iRio Tinto.
Yaphinda yenza kanjalo iDeMbare ngomnyaka olandelayo besidla iBosso 2-1.
IBosso iya kulumdlalo ngemva kokuthola umkhokheli omutsha uJohnfat Sibanda onqobe uKenneth Mhlophe kumkankaso wokudinga umgcinisihlalo weqembu obekhona ngempelaviki.
USibanda ukhethwe ukuthi akhokhele iBosso elo Morgan “Gazza” Dube osengunobhala jikelele kanye lo Mgcini Mafu othethe isikhundla sokuba lilunga lekhomithi.
