Kubusa uPrince loHlabangana

21 Nov, 2019 - 00:11 0 Views
Kubusa uPrince loHlabangana uPrince Dube

uMthunywa

YiNtatheli kaMthunywa

BATHI liphenduke laba yinto engedlekiyo iqembu leHighlanders nanko lezicoco ziyanda eqenjini.

Umgadli weqembu othenjiweyo uPrince Dube uphinde wathola isicoco sokuba ngumdlali owedlule bonke kunyanga edluleyo. Umqeqetshi uPieter de Jongh uthole isicoco sokuba yingcitshi yokukhuza iqembu.

Umqeqetshi lo ususe iBosso emsileni welogu yeCastle Lager, ikhangelane lehlazo lokuqeda isizini ikunombolo eyangisayo, wayifaka kwezinkulu. Okwamanje ihlezi kunombolo yesithupha.

Umgcinisihlalo weHighlanders uKenneth Mhlophe uthe ukuthola kwababili laba izicoco kuyisitshengiselo sokuthi iqembu liyaphakama.

“Iqembu lenguqu libonakala ngokwenza kuhle. IBosso isiliqembu qembu njalo itshengise ukuthi isingaqeda isizini ilezicoco ezinengi etafuleni. Ngithanda ukubatshayela ihlombe uPrince lomqeqetshi wethu uPieter ‘Hlabangana’ deJongh,” nguMhlophe lo esecingweni.

Kungxoxo abelayo loMthunywa, uHlabangana uthe ukuphiwa isicoco lesi kumnikeza idlabuzane.

“Yisicoco sethu sonke siliqembu. Bengingeke ngikwenze ngingedwa lokhu. Kusinika idlabuzane lokuqhubekela phambili. Ngijabuliswa ngabadlali langosekelo engiluthola kubalandeli,” kutsho umqeqetshi lo esanda ukugqiba uhlelo lokulolonga abadlali.

Ekhuluma esebulenjini mayelana lesicoco sakhe, uDube uthe ngomnyaka ozayo uzenza izimanga.

“Siqale isizini ngezinga eliphansi kodwa khathesi sesifuna ukuvala isizini sitshisa. Ngifuna ukuhlohla amabhola amanengi. Iqembu lethu lidinga abadlali abahlohlayo ngakho ngisebenzela ukuthi ngikwenze lokhu ngesizini ka-2020. Ngibonga abanye bami engidlala labo ngokunginikeza ithuba lokuthola amabhola amahle phambili,” kutsho uDube.

Uthe uzatshengisa abalandeli ukuthi yena unyawo lwakhe luyababa.

Enkambeni yabalandeli beBosso kulethemba lokuthi iqembu labo lizaphetha liyingqwele kumidlalo yeligi lonyaka.

IBosso izamelana leqembu leNgezi Platinum kunkezo yeChibuku Super Cup ekupheleni kwenyanga enkundleni yeBarbourfields. Ukunqoba linkezo kunikeza iBosso ithuba lokuthi ilwele eyinye inkezo yeCastle Challenge iphinde iyencintisa kumqhudelwano we-Caf Confederations Cup futhi.

Share This:

Sponsored Links