uMthunywa
YiNtatheli kaMthunywa
KUBOTSHWE indoda yeBrunapeg esiqintini seMangwe esabelweni seMatabeleland South ecatshangelwa ukuthi yatshontsha inkomo ezedlula ikhulu eKezi kunye laseBotswana.
Indoda le, uDumisani Moyo kubikwa ibotshwe ngemva kokubambisana kwamapholisa lezakhamizi.
Njengoba abadala babethi okulempondo akufihlwa emgodleni, ngokufanayo ngoLwesine kuviki ephelileyo izakhamizi zeKezi leMangwe ngaphansi kwenduna uHobodo kanye loBango zihlangene lamapholisa zathungatha umkhondo wakhe.
Kubikwa izakhamizi zalandela umzila andubana zithole uMoyo wahle wabotshwa.
UMoyo wakhokhela izakhamizi lamapholisa esibayeni sakhe esasilenkomo ezingu-110 ezitshontshiweyo, ezingabiza i-US$50 000.
Isikhulumi samapholisa esabelweni seMatabeleland South u-Inspector Loveness Mangena ukuqinisekisile ukutholakala kwenkomo eBrunapeg.
“Kulomhlambi wenkomo ezitholwe ngamapholisa ehlangene lezakhamizi eBrunapeg. Okwakhathesi asikayitholi imbiko egcweleyo ngalelicala,” kutsho u-Insp Mangena.
Kodwa-ke, izakhamizi zitshele intatheli ukuthi zilandele umzila wenkomo umango ongaba yi-20KM zaze zabona uMoyo endaweni elihlathi eSanzukwi.
UMnumzana Lazarus Ngwenya obeyingxenye yalelithimba lezakhamizi uthe ngemva kokubamba uMoyo bamphosa ngemibuzo wasesiyabatshengisa isibaya sakhe eBrunapeg lapho ayegcine khona inkomo ezebiweyo eziphezulu kwekhulu.
“Kubukeka sengathi ubegila izimanga lapho eqoqa khona inkomo ezifaka endaweni yakhe. Ubetshontsha inkomo ezisukela eKezi laseBotswana. Ezinye izakhamizi zenelise ukuthola inkomo zazo. Kwezitholakeleyo, kulamathole angu-40,” kutsho uMnu Ngwenya.
Uthe uMoyo wabanjwa ngemva kokuthi abantu bethole imbiko yokuthi inkomo zabo ziqoqwa njani endaweni.
“Kunyanga ezimbili ezedluleyo sithole umkhondo wokuthi izifuyo zethu bezitshontshwa njani. Sasungula amaqembu ehlukeneyo ukuze sizame ukubamba amasela la. Kungakho siphume ijumo ngoLwesine obekuhloswe ngalo ukulwa lamasela ezifuyo.
“Lokhu sikwenze ngokubambisana futhi njengabantu basemakhaya kanye labakhokheli bethu bomdabu. Ngosizo lwamapholisa eMphoengs enkambeni yawo eBrunapeg, sithole inkomo ezingu-110 ebezigcinwe eBrunapeg,” kutsho uMnu Ngwenya.
Kusenjalo, uInsp Mangena uthe amapholisa aphinde abopha abantu ababili eMayobodo eMangwe asebegwetshelwe ukutshontsha izifuyo.
