uMthunywa
Thokozile Mbedzi
NGESIKHATHI emhlabeni jikelele kujatshulelwa njalo kuhlonitshwa abesifazane kulenina leMaphala eNkayi elilulazwe emphakathini laphinda letheswa icala lokuba ngumthakathi ngotsikamutanda, isenzo esisolwe yizakhamizi zesigabeni lesi okwenze zaze zayamangalela otsikamutanda laba.
Isalukazi lesi, uLorraine Siyazulu esileminyaka engu-60 yokuzalwa setheswe umlandu wokugcina isandla somuntu kanye lokuba lemithi emibi yokuloya, ngalokhu sasesihlawuliswa inkomo eziyisithupha okwenze izakhamizi zakhonona ngoba zingazange zisibone leso sandla obekukhulunywa ngaso.
Utsikamutanda lo uShadreck Mutungeni kazange ame lapho waqhubeka njalo wethesa ezinye izakhamizi ethi zilezinto ezizisebenzisayo zokuganga kungakho kumele zizilethe kuye.
Ngesikhathi esenza konke lokhu uMutungeni waphinda njalo wacaba abantu ngama-razor ethi khona bezakhululwa kumimoya le.
Kubikwa uSiyazulu laye ngomunye walabo okwakuthiwe alethe izinto zakhe okwacina kusenza kuthiwe ulesandla somuntu kodwa akula owasibonayo.
Lanxa abantu babekhonona ukuthi isandla abasibonanga uMutungeni wathi ufuna uSiyazulu ahlawule inkomo eziyisithupha wamcaba kabuhlungu.
Ekhuluma lentatheli kaMthunywa uNkosazana Bonakele Moyo uthe otsikamutanda bebengasazwisisi besithi bafuna inkomo eziyisithupha ngapha becabe uSiyazulu ngendlela ebuhlungu.
“Kube buhlungu kakhulu ngoba abantu babekhangelele ukuncediswa ngutsikamutanda kodwa akusabanga njalo, abantu besebehlawuliswa inkomo ezinengi njalo abantu becatshwa kabuhlungu belimala ngama-razor.
Abanye esigabeni bezwa usizi bancweba amapholisa indlebe ngoba uLorraine ubesehlaselwe nguMutungeni Shadreck labanye bakhe, uLunga loMoyo bethi kabhadale inkomo ezingu-6 ngoba bakhiphe isandla lemithi. Abantu lokhu kwabazwisa ubuhlungu isandla kabazange basibone kodwa inhlawulo ethi uyayifuna loba kanjani,” kulandisa uNkszn Moyo.
Esinye isakhamuzi esithande ukwaziwa ngokuthi nguMlotshwa nje kuphela sithe indlela otsikamutanda abaziphatha ngayo ezigabeni eziyabe zidinga uncedo iyasolisa kakhulu.
“Otsikamutanda sonke isikhathi nxa bethi bayasiza abantu babethesa amacala abangelawo ngemva kwalokhu baphinde bababambe ngamandla ukuthi kabababhadale.
“Okunye okutshengisa ukuthi bavele kabathembekanga yikuthi bangavele babekwazi ukuthi ulenkomo bahle bahlose wena njalo bakuqophe bakwenze uze uzikhiphe loba ungafuni.
“Banengi abantu asebedlelwe inkomo zabo ngoba bengazi ukuthi bangathola ngaphi usizo,” kutsho uMlotshwa.
Isikhulumi samapholisa esabelweni seMatabeleland North u-Inspector Glory Banda ebuzwa ngodaba lolu uvumile wathi solufikile kibo.
“Udaba lwesalukazi esetheswe icala lokuloya sahlawuliswa inkomo eziyisithupha lufikile kithi. Sithanda ukubonga uzulu ngokusazisa ngendaba le masinyane okubangele ukuthi utsikamutanda lo labanye bakhe babotshwe.
“Banengi abantu abaqilwa ngotsikamutanda kungakho-ke uzulu kumele asebenzelane lamapholisa ekubambeni izigilamkhuba lezi.
“Okunye njalo sinanzelela ukuthi laba bantu babuthanisa abantu ngesikhathi se-Covid-19. Lokhu akulunganga njalo kuyabophisa. Otsikamutanda laba bandise ukubuthanisa abantu abanengi kakhulu okungaba yingozi,” kuphetha uInsp Banda.
