uMthunywa
Izakhiwo zamabandla okholo ziyahlonitshwa yonke indawo nanko phela kulapho abantu abakhonza iNkosi.
Indawo lezi ziphinda njalo zibe zindawo yokuphephela kulabo abadabukileyo lalabo abadinga ukusiliswa kanye lokuthethelelwa izono zabo.
Ngaphandle kokuba yikho konke lokhu, esinye isakhiwo sebandla alaziwayo eJohannesburg siphenduke saba yindawo yecala nanko phela kubanjwe umntwana oleminyaka yokuzalwa eyisithupha iganyavu.
Isehlakalo lesi senzakale ngeviki ephelileyo lapho ogcina lesisakhiwo ephendukele umntwana wamdlova.
Ngokutsho kwesikhulumi samapholisa eGauteng umsolwa wabiza umntwana wangena laye phakathi esontweni okuyilapho ambamba iganyavu.
Umntwana lo kubikwa wathi ephuma esontweni wabikela omunye umakhelwane ngokwakwenzakele wahle wayabikela amapholisa.
“Amapholisa ahle abopha umsolwa njalo kwavulwa idokhethi ngaphansi kophiko lwamapholisa olukhangela ngokuhlukunyezwa kwabantu kwezocansi,” utsho njalo.
Isikhulumi sekhansili yebandla umphurofethi George Mahlobo uthe njengebandla bayasigxeka isehlakalo lesi.
Uthe amabandla okholo ayindawo okumele ihlale iphephile.
“Akwamukeleki ukuthi kulabantu abahlukuluza abantwana ngalindlela ikakhulu kusakhiwo sokukhonza.
“Amapholisa kanye lomthetho kumele amjezise lumuntu.
“Kumele kwaziwe ukuthi njengebandla asikuvumeli lokhu okwenzakeleyo njalo sizayilandelela lindaba size sisuthiseke ukuthi umsolwa uzajeziswa,” utsho njalo.
