uMthunywa
Tina Lobs Buhegwedu Dube
Yelo dama bakanyikwedu. Likati kowhodza danda yakaLufu hayina zebe. Ndisingazibe kuti ingaba ilini. Ingaba hulo, mhene, zilawa kene mhala apa kulikuti imhuka kene ipibozwayo inazina lingandilana netjinolebgwa kuyi “Kowhodza danda yakaLufu hayina zebe”.
Ipapo zebe inoba inadzo koga dzisipo. Dzisipo nekuti hadzisingawhe hadzitapo. Zebe izebe hadziwha.
Kosoyi awuna zebe koga iye unoleba akadzilinga, umwe nsi dzakapapa dzinga whatjulu, dzakamela dzikakula dzisiya n’holo kwawungati wakalinga ukakumbula kuti zebe dzawhoyi nhu dzowhopululudza.
Umwe nsi usina nsi umwe nlume waka eyenda ekhomayila zwe enotanha timela enokumba kudoropo kati azobhuzwa.
Lakalisi hhuba lile. Lakalipisa hhuba nemavu asingatshambike nela Adam. Mahalabgwana enjenjema etuwadza newunowalinga kulitjilimo kwatjimela nezwinyame bondakubhaya.
Banoziba takakula tizana mumakula titi ndakubhaya akuhomola tibala zwinyame.
Nlume iwhoyu atjakhomayila, atjilinga kunotanigwa yelogole levula mbeli kukwe. Vula itangisa dona. Atjakalinga ebona vula yaswika kuti kwidi kan’ompela ebva apela masimba ebona kuti nasi vula yanwunrobota.
Ekonongina tjini mutimela abevula dzoga? Ipapo waka atongopinda pagunon’wiwa akatongogubhaya. Kutjakajalo akalinga vula inona wakabva anyalamoyo ezwibona aniwa kale.
Kutjakajalo wakawha ehhigwa nontundo eba eti ngandibve ndazwitundila ngobe ndaniwa kale. Ipapo tjinyolotjo elekedzela mabhurugwe ebadapatapa.
Kana nowunzibabo ntundo wonhu wakalaladza, ate nhuwa! Epedza koga, ebona vula yaaka eti inohha kunwuli itjekeledza iwuntihha nepaayapo kubhaya hhuba etjenama koga.
Wakadzoyitatamila vula iti wawandibiga poni. Tjinyolotjo etjakahangana n’holo netjatikala etatamila vula wakazwiwana aswika panotanigwa, vula yapinda nebaka balimile panotanigwa baniwa batjenama.
Bakabakambala dzisutu bozwidla mafupa enholo bekumbula kuti maheleni eDry Clean banowhawana poni? Iye wakati enoswika akaniwa kuntha inobhatisa honi.
Waka akasenga whobhodo iye nhukununu yebana bekwele yosenga mabhuku, ndiyo yaakakosa mbeli ezwina kuti banhu basi bone. Ngono kwakakulipatjena.
Banhu baka bewunlinga ubona belingana beseka. Baka bebona. Lakalisi hhuba lile.
Tjisanhu tjikaswika timela banhu baka bezuwa nekwembava dzinokwibila banhu muna iyawo mahhuba. Nkhwinya wedu nayiye waka akawhilila koga nkumbulo uti “banhu banowhonditini ndazwitundila ndili nlumetate ungapa.
Iye nkadzikulu ke? Ikweno kun’umba apa ebona ndijita unondilabukila etini, izo zwanana ke? Apandonda kun’umba, ndowokuwelegwa nasi”. Lakabva liswikake hhongololo lemakhuwa.
Banhu abetjulukila mutimela bengina, nkhwinya wedu ebva ahanganidziwa nonlume wakambala zwakanaka akabhata tjimbalo tjakapetelegwa zwakanaka nepulasitiki linolakidza zwimkati.
Nlume iwhoyo wakahha eti “Bhurugwe, bhurugwe madola mahanu koga hawilila tojitisa”.
Hazotongogala alila wakabva atenga. Hati kowhodza danda! Dama lojalo. Wakalabuka enda kun’umba nhukununu eti nti wazwitsha eswika engina azotongokumbula, embula ilelo gulukugwi eposa newindi eti “mitundo kuhhe!”.
Unojalo waposa bhurugwe kati waposa nemari imulili, zwithupha kose nemaphilisi ma anti-retro virals emwedzi wose anda.
Wakati elilekedza koga linda kubuya munkumbulo kuti mali nemaphilisi kwanda. Waka asingake akalimisa hhongololo.
Wakalinga newindi akakaabala ebona kuti hango yaGambu yapalala, mari yose yanda. Kuto kowhodza danda hayitomuka unganobhata nemaboko.
Tjatjilebgwa nekwembava azogala atjikumbula. Ulelezwe, busiku, kutema kumeho konga kumeho ehoko. Apa ethathanula plastiki yakapetela bhurugwi unowana kuti bhurugwe laatengesegwa alizopelela.
Igumbo lin’ompela lisingaswike nekunhunji. Wakabhaya guwo lisihoma alimun’umba nhukununu. Wakatjidziwa nompanganyana waaka akasenga muwhobhodo yebana bekwele.
Wakatola mpanga epubula whobhodo mabuli mabili anolizana makumbo eyitola embala eta nsubelo ebhuda, khomayila kwapela banhu bebona yodombayila nezwidzwa zwitehlanana inga inowhovunika, inogala zwayo pasi whope dzinunga.
Towhobonana, yakaLufu ayinazebe.
Kalanga Language and Cultural Development Association; [email protected]; +263772610726
