uMthunywa
Thokozile Mbedzi
INHLANGANISO ebona ngezokulima eye-Agritex isikhuthaze uzulu ukuba kakhethe inhlanyelo eqondileyo ngoba izulu lonyaka lilutshwana.
Ekhuluma lentatheli kaMthunywa uMqondisi we-Agritex esabelweni seMatabeleland North uMnumzana Dumisani Mbikwa Nyoni uthe uzulu kakhethe inhlanyelo efanele indawo alima kuyo.
“Uzulu kakhethe inhlanyelo ngonanzelelo ngoba kuqakathekile ngalesi sikhathi esikuso ngoba kudingeka inhlanyelo ephangisa ukuvuthwa.
“Izulu lonyaka lilutshwana ngakho abalimi kumele balime izilimo ezizaphangisa ukuvuthwa ikakhulu amabele, inyawuthi, indumba omaqutha, amazambane, indlubu kunye lomumbu ophangisa ukuvuthwa ngamalanga angu-90,” nguMnu Nyoni lowo.
“Ekulimeni abalimi kumele bananzelele ukuba amalanga lawa aqakathekile kakhulu ngoba kwenza umlimi alime esazi ukuba nxa izulu selisima ukuna laye izilimo zakhe zibe sezivuthiwe.
“Abalimi kumele bathole ulwazi lolu ngoba luqakathelile kakhulu kumele balime belolwazi ukuba umkhathi abakhangelane lawo ngomnyaka abakuwo unjani njalo yiziphi iziqondiso okumele bazilandelele.
“Abangathanda ukuba balime umumbu kumele balime inhlanyelo ezivuthwa ngamalanga angu-90 ukuze bengalahlekelwa yisivuno sabo. Inhlanyelo lezi nxa bezithenga ziyabe zibizwa kuthiwa ngama-early varieties.
“Abalimi kumele njalo bananzelele lokhula ngoba luyingozi. Ukhula kumele luhlakulwe ngaso sonke isikhathi izilimo zingancintisani lalo ngoba luyehlisa isivuno umlimi acine asengasatholi lokho ayabe ekukhangelele,” kutsho uMnu Nyoni.
“Abalimi ukuze bengatshiywa lizulu balakho njalo ukuba bancedisane ukulima babophe inkabi zabo loba obabhemi balimele omunye baphinde njalo balimele omunye.
“Lekuhlakuleni babambane lokhu kwenza ukuthi umsebenzi ubelula njalo bangaze bakhulelwa lukhula loba ukutshiywa ngumkhathi inhlanyelo zabo zivuthwe ngendlela eqondileyo.
“Abalimi bangathola ulwazi njalo kubalimisi abaseduzane labo babancedise ngenhlanyelo ezihambelana lomkhathi abahlala kuwo ukuze bathole isivuno esihle,” kuphetha uMnu Nyoni.
