uMthunywa
Wayne Ncube
ABALIMI abasendaweni ezingela zulu elinengi sebekhuthazwe ukuthi bakhethe kuhle inhlanyelo abazayilima ngoba indawo zabo kazivumi yonke nje imihlobo.
Ingcitshi kwezenhlanyelo kunkampani yeSedco uNkosazana Ayanda Tshuma uxwayise abalimi abasendaweni ezingela zulu elinengi ukuthi bathenge inhlanyelo ezifaneleyo ezifana lemihlobo ebalisa iSC 301, SC 403, SC 513, kumbe iSC 529, ngoba yiyo elungele indawo ezithola izulu elilutshwana.
Ekhuluma lentatheli uNkszn Tshuma uthe abalimi kuqakathekile ukuthi babekwazi ukuthi umhlabathi wabo uvuma yiphi imihlobo yenhlanyelo bengakayithengi ukuze bangalahlekelwa.
“Indawo ezifana leKezi, Plumtree lase Tsholotsho abalimi bakhona kumele bakhethe inhlanyelo efana le SC 301 kanye le SC 403 ngoba yiyo efanele ukulinywa kuleyondawo.
“Ingcitshi zokuhlola umhlabathi lezinga lokuthola izulu zenhlanganiso yethu zivakatshele kulezindawo zahlola umhlabathi kanye lezinga okuna ngayo izulu yikho lapho ababona khona ukuthi indawo lezi zifanelwe yile inhlanyelo ngoba umhlabathi uqinile njalo izulu lilutshwana.
“Imihlobo yenhlanyelo le kayiphangisi kuphambaniseka zingagqitshelwa ngakho zilungele lezo ndawo,” kuchaza uNksz Tshuma.
Uqhubekele phambili esithi umhlobo we SC 513 kumbe uSC 529 ingakhethwa ngabalimi bendawo ezitshiyeneyo.
“Inhlanyelo efana le SC 513 le SC 529 iyalimeka iloba kuwuphi umhlabathi njalo abalimi abahlanyela leyi inhlanyelo bayaxwayiswa ukuthi kabalime ngesikhathi esifaneleyo ukuze babe lenzuzo enhle.
“Inhlanyelo lezi ziyatholakala enkampanini zonke ze SeedCo lapho abalimi abangathola iSC 301 i10kg yi$354, iSC 403 i10kg yi-$354, kuthi i5kg yi$177, iSC 513 10kg iyi$218 kanye le SC $529 10kg eyi$390.
