uMthunywa
MTHWAKAZI omuhle njengoba lisazi ukuthi iphephandaba kalidinwa ngezimnandi namuhla lize lazo njalo. Nanko phela lize lendoda mdabuko etshaye yalobisa abaculi beTshibilika abalapha koMthwakazi. Kambe kungaba ngubani bakwethu ngaphandle kuka Clement Magwaza Ncube? Kasitshayi nje isiginci lindoda iyaphoxa njalo kayiculi nje inyoni yezulu ingumfana.
Othanda ukujabula lonyaka angabala okunengi ngalinsizwa kungxoxo ephakathi kwentatheli yephephandaba likazulu uCornelius Luphahla (CL) lengwevu yodumo uClement Magwaza Ncube (CMN). Woza lendlebe mlaleli nansi indaba eluluju.
CL: Tshela umphakathi jahelibanzi ngembali yakho kanye leyomculo wakho.
CMN: Mina ngazalwa ngo1977 esigabeni seMpandeni ePlumtree, ngomnyaka ka 1982 ngayaqala ukufunda esikolo seKwite Primary khona eMpandeni ngaze ngayaqeda uGiredi 7 ngo 1992. Kwathi ngo1996 ngayafunda uFomu 1 e-Embakwe High School ngayaqeda uFomu 4 ngo1996. Ezokucula ngaziqala ngo 1997 lapho engahlangana khona loMadalaboy ngacula laye kwaze kwayafika u1999. Kwathi ngo1999 ngayacula leNdolwane Super Sounds kwaze kwayafika u2004. Ngo 2005 ngasungula elami iqembu elalithiwa yiMacray Super Sounds. Ngakho ke ngenxa yokucula ngizibiza ngokuthi nginguMagwaza abantu baphetha bebiza iqembu lami ngokuthi Magwaza.
CL: Akutsho mfokaNkatha ukuba lokhu waqala umculo lo sowakhipha amadlalade amangaki njalo abantu bathini ngomculo wakho?
CMN: Njengomculi khathesi sengakhipha amadlalade ayisithupha agoqela elithi Sineke, Benda, Take take, Uyal’ugogo, Mpalakazi kanye lelithi Isitambo sami. Ngalokhu-ke abantu bayawujabulela kakhulu umculo wami.
Njengedlalade lalonyaka lona lingiphakamise kakhulu sibili ngoba lapho engihamba khona wonke umuntu uyabe edlala lona.
CL: Njengomculi osedumile sowake wathola sicoco bani ekuhlabeleni njalo wasithola nini?
CMN: Lokhu ngaqala ukucula bengingaculeli kuleli bengiculela kweleSouth Africa ngakho ingoma zami bengingazake ngizihambise emsakazweni yikho bengingakaze ngithole isicoco. Khathesi ngithe ngemva kokuzihambisa ngihle ngathola isicoco sokwedlula abaculi bonke kuzinga eliphezulu ebelilamaqembu angu-50.
Ngakho kusobala ukuthi ngabe ngaqala kudala ukungena kumncintiswano wabaculi ngabe sengathola izicoco ezinengi.
CL: Tshela abantu Magwaza ukuba bunzima bani oyake uhlangane labo njengomculi njalo nkuthazo bani oyipha abaculi abasacathula.
CMN: Ubunzima engahlangana labo ekuculeni yikuthi ngethuba ngisaqala ukucula ngangikhathazwa yikuswela imali yokuthenga imitshina yokuhlabelisa kanye leyokukhipha amadlalade. Okunye njalo khathesi uhlupho engihlangana lalo yikuthi abanye abantu bayangitshontshela umculo wami bawuthengise ngentengo ephansi okudala ukuthi lami ngicine ngisehlisa intengo yomculo wami njengoba labo bewuthengisa ngentengo ephansi okudala ukuthi ngingathuthuki kuhle. Ngalokhu-ke ngithi abaculi abasacathula kababambe ziqine ukuze bathuthuke njalo bengadeli. Okunye njalo ngithi kabahloniphe umphakathi ukuze labo bahlonitshwe njalo ingoma zabo kaziveze inhlonipho.
CL: Ngaphandle kokucula kuyini njalo okwenzayo empilweni njalo ukhangelele ukwenzani lonyaka?
CMN: Mina akukho okunye engikwenzayo ngaphandle kokuhlabela ngakho-ke lonyaka ngikhangelele ukujabulisa uzulu ngokuvakatshela indawo ezinengi zakoMthwakazi ngizitshayela ingoma zami.
